მინდა, რომ ჩემი ქვეყანა ვასახელო და ბევრი წარმატება მოვუტანო – ინტერვიუ ევროპის ჩემპიონ გიორგი ჩხიკვაძესთან

ბულგარეთში, ბერძნულ-რომაული სტილით სახეობაში, 23-წლამდე მოჭიდავეთა ევროპის ჩემპიონატი გაიამართა, სადაც საქართველოს ნაკრებმა 4 ოქროს 3 ვერცხლისა და 1 ბრინჯაოს მედლით პირველი ადგილი დაიკავა.

ჩემპიონები გიორგი შოთაძე (63 კგ) დიეგო ჩხიკვაძე (67 კგ), გიორგი ჩხიკვაძე (72 კგ) და გიორგი ქაცანაშვილი (97 კგ) გახდნენ.

“პრაიმ სპორტი” ერთ-ერთ ჩემპიონ, გიორგი ჩხიკვაძეს დაუკავშირდა და მასთან მცირე ინტერვიუ ჩაწერა. ახალგაზრდა მოჭიდავე 2018 წელს ბუენოს აირესში, პირველი ქართველი სპორტსმენი გახდა, რომელმაც ახალგაზრდულ ოლიმპიადაზე ოქროს მედალი მოიპოვა. გიორგის ოლიმპიური თამაშებზე ოქროს მედლის მოპოვება დიდებს შორისაც სურს და ამბობს, რომ ამისთვის ყველაფერს გააკეთებს.

– როგორი შეგრძნებაა იყო ევროპის ჩემპიონი?

– ძალიან მაგარი შეგრძნებაა, როცა შენს ქვეყანას ასახელებ, საქართველოს დროშას აღმართავ და შემდეგ ჰიმნი ისმის. ძალიან ბედნიერი ვარ.

– შემართება როგორი იყო?

– საკმაოდ კარგი. შეჯიბრისთვის კარგად მოვემზადე და ბრყინვალე ფორმაში ვიყავი. არა მხოლოდ მე, ყველა მოჭიდავეს მწვრთნელები და ფედერაციის ხელმძღვანელები ძალიან დაგვეხმარნენ.

– როგორ ფიქრობ, ფინალურ შეხვედრაში მეტოქეს რის ხარჯზე აჯობე?

– ვფიქრობ, რომ ჩემი ხასიათით ვაჯობე, ფინალურ შეხვედრაში ხალიჩაზე მოსაგებად ვიყავი შესული და მოვიგე კიდეც!

– შენს წარმატებაში მთავარი წვლილი ვის მიუძღვის?

– პირველ რიგში ვარჯიშს და იმ ადამიანებს, ვინც მამზადებდა და გვერდში მედგა ბოლო წუთამდე. ასევე, არ შემიძლია არ აღვნიშნო გულშემატკივარის მხარდაჭერა, რაც ყოველთვის ძალიან მეხმარება.

– მოტივაციას რა გაძლევს?

– პირველ რიგში ოჯახი და შემდეგ სამშობლო. მინდა, რომ ჩემი ქვეყანა ვასახელო და არაერთი წარმატება მოვუტანო.

– 4 ოქროს, 3 ვერცხლისა და 1 ბრინჯაოს მედლით საქართველოს ნაკრებმა ევროპის ჩემპიონატზე პირველი ადგილი დაიკავა, როგორ ფიქრობთ რის ხარჯზე მიაღწიეთ ამ შედეგს?

– ერთობლივი შრომით, სწორი ვარჯიშებით, მწვრთნელების, ექიმების და გუნდურობის ხარჯზე ვაჩვენეთ ასეთი კარგი შედეგი.

– რა არის შენი მიზნები უახლოეს მომავალში?

– რა თქმა უნდა ისევ ვარჯიშს გავაგრძელებ და მსოფლიო ჩემპიონატისთვის მოვემზადები, რომელიც რამდენიმე თვეში ბარსელონაში გაიმართება.

– რა არის შენი ოცნება?

– ჩემი ოცნება ოლიმპიური ჩემპიონობა გახლავთ.

– რას ეტყოდი ახალგაზრდა მოჭიდავეებს?

– ვეტყოდი, რომ არასდროს დანებდნენ სულ ივარჯიშონ და შრომა ადრე თუ გვიან დაფასდება. მთავარია ბოლომდე იბრძოლონ, თავიანთ მიზნებს გაყვნენ და ჩაეჭიდონ ამ მიზნებს.