მოკრძალებული ჩემპიონი

თბილისის „დინამომ“ ზედიზედ მეორე გამარჯვება მოიპოვა და ბათუმთან ერთად ეროვნული ლიგის მიმდინარე გათამაშების ლიდერობას განაგრძობს.

ქვეყნის მოქმედმა ჩემპიონმა და ყველაზე ტიტულოვანმა გუნდმა დინამო არენაზე გათამაშების უპირობო აუტსაიდერს – „თელავს“ უმასპინძლა და ალბათ ბევრისთვის მოულოდნელად, საკმაოდ მოკრძალებული ანგარიშით – 1:0 სძლია.

კახური გუნდი აშკარა კრიზისშია და ალბათ ქვედა ლიგაში დაქვეითების უპირობო კანდიდატია. თელაველებმა მიმდინარე სეზონში უკვე მწვრთნელის შეცვლაც მოასწრეს და რევაზ გოცირიძე დაითხოვეს. „დინამოსთან“ დაპირისპირება კი გიორგი მიქაძისთვის თელაველთა თავკაცის რანგში პირველი იყო, თუმცა ფეხბურთელებმა საჩუქარი ვერ გაუკეთეს.

თბილისელთაგან მატჩის ერთადერთი გოლი საბა ხვადაგიანმა გაიტანა, რომელიც დინამოს აკადემიის აღზრდილია და 18 წლის ძალზედ ნიჭიერი ფეხბურთელია.

„დინამო“ 31 ქულით სატურნირო ცხრილში მეორე ადგილზეა, ხოლო თელაველები 8 ქულით ფსკერზე იმყოფებიან.