რუსმა საფეხბურთო ექსპერტმა ალექსანდრ ბუბნოვმა “Sportbox” – თან ხვიჩა კვარაცხელიაზე ისაუბრა და აღნიშნა, რომ შედეგიანობას უნდა მოუმატოს.
“ხვიჩას ტრავმები ჰქონდა, რის შემდეგაც მისი და დესპოტივიჩის დუეტი ისეთივე ეფექტური ვეღარაა. ცხადია, იმოქმედა ტრანსფერზე გაუთავებელმა საუბრებმა, მეტოქეებმა კი მის წინააღმდეგ უფრო ყურადღებით თამაში დაიწყეს. ის დრიბლინგს კვლავინდებურად კარგად იყენებს, თუმცა, მოედნის ცენტრში ბევრი ფეხბურთელის გარემოცვაში ხშირად ხვდება. რუბინის მთელი შეტევითი თამაში, ფაქტობრივად, მასზეა აწყობილი. გუნდი ვერ ახერხებს თავისუფალი ზონების გამოყენებას მაშინ, როდესაც მთელი ყურადღება ხვიჩაზეა გადატანილი. თავდაპირველად, რუბინში შედეგიანობა უნდა გაზარდოს, სხვა შემთხვევაში, ფეხბურთელზე, რომელსაც მოქმედი კონტრაქტი აქვს, მოთხოვნა არ იქნება”, – განაცხადა რუსმა ექსპერტმა.
ცნობისთვის, 66 წლის ალექსანდრ ბუბნოვს კარიერა მოსკოვის “დინამოსა” და “სპარტაკში” აქვს გატარებული.
