ჩვენი კალიბრის გუნდებისთვის, ევროპისა თუ მსოფლიო ჩემპიონატების შესარჩევი ეტაპის წილისყრას დიდი მნიშვნელობა აქვს და გულშემატკივრის მოლოდინიც გაცხოველებულია. ასე იყო 7 დეკემბერსაც, როდესაც ციურიხში 55 ქვეყნის ნაკრებს ყატარის მუნდიალისკენ სავალი გზა განესაზღვრა. ვიღაცას გაუმართლა, ვიღაცას არა, ზოგი კმაყოფილია, ზოგმა კი იმედები უმალ გადაიწურა.
ბუნებრივია, წილისყრისადმი ინტერესი ტოპ გუნდების ქომაგებს თუ მწვრთნელ-ფეხბურთელებსაც ამოძრავებთ, მაგრამ არა გვგონია ისე განიცდიდნენ ან დიდად ანიჭებდნენ მნიშვნელობას ჯგუფის შემადგენლობას, როგორც ეს მეორე ან მესამე ეშელონის ნაკრებებს ანაღვლებთ. ისინი ფავორიტები არიან და პირველი ადგილის გარდა სხვა შედეგი მიუღებელია. იშვიათი გამონაკლისების გარდა ასეც ხდება.
ესპანეთის ნაკრების დამრიგებელი ლუის ენრიკეც, ციურიხული წილისყრის შედეგებს დიდი ვნებათაღელვის გარეშე შეხვდა.
„ნებისმიერ შემთხვევაში, მთავარი მიზანი მსოფლიო ჩემპიონატის საგზურის მოპოვებაა. წილისყრის შედეგებს ჩვეულებრივად შევხვდი, ყოველგვარი ემოციის გარეშე. ვინც არ უნდა გვყოლოდა მეტოქეებად, 3 ქულის გარდა არაფერი დაგვაინტერესებდა. ასე იქნება ახლაც.
რაც შეეხება ჯგუფს, ვფიქრობ მისაღებია. ზოგიერთ გუნდს კარგად ვიცნობთ, ზოგიერთზე წარმოდგენაც არ მაქვს. მსოფლიო ჩემპიონატის საკვალიფიკაციო ეტაპზე თამაში ყოველთვის ამაღელვებელია და საუკეთესო შედეგის დაფიქსირებაზე უნდა ვიზრუნოთ. ქომაგები სხვანაირად არ გვაპატიებენ. დიდი ფორუმზე მარტივად ვერასდროს მოხვდები. ჩვენც იოლი გასეირნება არ გველის, თუმცა მჯერა მთავარ მიზანს მივაღწევთ“ – ამბობს ლუის ენრიკე ესპანურ მედიასთან კომენტარში.
ალბათ შეხსენება არ გჭირდებათ, რომ საქართველოს ნაკრებს, „ყატარი 2022“-ის საკვალიფიკაციო ეტაპზე ესპანეთთან, შვედებთან, საბერძნეთთან და კოსოვოსთან მოუწევს ჭიდილი.
