იტალიის ქალაქ პარმაში დასრულდა პრესტიჟული საჩოგბურთო ტურნირი ქალთა შორის, რომელშიც ამერიკელმა კორი გოფმა გაიმარჯვა.
WTA-ს შეჯიბრი პარმაში პირველად ჩატარდა და ახალგაზრდა ამერიკელი მეჩოგნეც ამ მხრივ ისტორიაში ჩაეწერა, თუმცა გოფმა სხვა კუთხითაც გამოიჩინა თავი. კერძოდ, ნიჭიერმა ახალგაზრდა ჩოგბურთელმა პარმაში ორივე თანრიგში, როგორც ერთეულთა, ასევე წყვილთა თანრიგში იჩემპიონა.
ასეთი რამ 2004 წლის შემდეგ აღარ დაფიქსირებულა, როდესაც ამა თუ იმ ჩოგბურთელს ასეთ ახალგაზრდულ ასაკში ერთ ტურნირზე ორ თანრიგში გაემარჯვოს.
ამრიგად, კორი გოფმა მარია შარაპოვას რეკორდი გაიმეორა. რუსმა ლამაზმანმა, რომელმაც კარიერა შარშან დაასრულა, 2004 წელს, ორივე თანრიგში ბირმინგემის ტურნირზე გაიმარჯვა. მაშინ მარია შარაპოვა 17 წლის და 55 დღის გახლდათ.
რაც შეეხება კორი გოფს, მან პარმაში ჩემპიონის ტიტული 17 წლის და 70 დღის ასაკში მოიპოვა. ერთეულებში ფინალში ჩინელი ვან ციანი დაამარცხა, ხოლო წყვილებში ტრიუმფალურად ქეით მაკჰეილთან ერთად ითამაშა.
