ფუტსალში, 2022 წლის ევროპის ჩემპიონატის შესარჩევი ეტაპის მეორე მატჩში საქართველოს ნაკრები თბილისის ოლიმპიურ სასახლეში რუსეთის ნაკრებს შეხვდა და დიდი ანგარიშით, 0:4 დამარცხდა.
მატჩის დასრულების შემდეგ, ჩვენი გუნდის მთავარმა მწვრთნელმა, ავთანდილ ასათიანმა განვლილი შეხვედრა შეაფასა.
„ჩვენს გულშემატკივარს ამ ანგარიშის გამო ბოდიში მინდა მოვუხადო. მათ ვპირდები, რომ ყველაფერს გავაკეთებ, რათა ეს შეცდომები გამოვასწოროთ და ევროპის ჩემპიონატზე ვითამაშოთ. ადრეც ვიძახდი და ახლაც გავიმეორებ, საქმე გვქონდა ძალიან მაღალი კლასის გუნდთან, რომელთანაც თამაში ძალიან ძნელია. გამოჩნდა, რომ კლასით ძალიან მაღლა იყვნენ. ჩვენ ნამდვილად ყველაფერი გავაკეთეთ, მაგრამ იმასაც ვიტყვი, რომ ეს არაა ჩვენი დონე. ბრძოლა კიდევ უფრო მაღალი მიზნებისთვის შეგვიძლია. შემდეგი ორი მატჩი ყველაზე მნიშვნელოვანია და სასურველი ანგარიშით უნდა დავასრულოთ. ჯგუფიდან ორი გუნდი გადის და მეორე ადგილისთვის უნდა ვიბრძოლოთ. ჩემს გუნდს ამის ძალა გააჩნია, ამაში 100%-ით დარწმუნებული ვარ“, – განაცხადა ავთანდილ ასათიანმა.
საქართველოს ნაკრები ევროპის ჩემპიონატის შესარჩევი ეტაპის მორიგ მატჩს 5 მარტს, საკუთარ მოედანზე სომხეთის ფუტსალის ეროვნული გუნდის წინააღმდეგ გამართავს.
