უნგრეთში მიმდინარე ტოკიოს ოლიმპიადის სალიცენზიო ტურნირზე რამაზ ზოიძემ და ლაშა გობაძემ ფინალში გასვლა მოახერხეს, რაც იმას ნიშნავს რომ ორივე სპორტსმენი ოლიმპიურ თამაშებზე გამოვა!
ბერძნულ-რომაული სტილით ჭიდაობაში რამაზ ზოიძემ, რომელიც 67 კგ წონით კატეგორიაში გამოდის ნახევარფინალში სომეხი სლავიკ გალსტიანი დაამარცხა, 87 კგ წონით კატეგორიაში მოასპარეზე ლაშა გობაძემ კი ასევე ნახევარფინალში რუს მილად ალიარზევს მოუგო. ორივე მოჭიდავე ფინალში იასპარეზებს, რომელიც ხვალ გაიმართება.
აქვე გეტყვით, რომ ბერძნულ-რომაული სტილით ჭიდაობაში ზოიძის და გობაძის გარდა ტოკიოს ოლიმპიადის ლიცენზია კიდევ ორ მოჭიდავეს – გიორგი მელიას (97კგ) და იაკობ ქაჯაიას (130კგ) აქვთ მოპოვებული. ორივე მათგანმა ოლიმპიადაზე ასპარეზობა ნურსულთანში გამართულ მსოფლიო ჩემპიონატზე გაინაღდა.
