საქართველოს ნაკრების და ზოგადად ქართული ფეხბურთის ერთ-ერთი მთავარი იმედი ხვიჩა კვარაცხელია რომ დიდი ალბათობით მომავალი სეზონიდან რომელიმე ტოპ ევროპულ ჩემპიონატში გააგრძელებს კარიერას არახალი ამბავია.
20 წლის ტალანტის მიმართ ინტერესს არაერთი გრანდი თუ საშუალო დონის ევროპული გუნდი აცხადებს. ცხელი სატრანსფერო ზაფხული გველის და ჩვენი ყურადღებაც ბუნებრივია უმთავრესად ხვიჩას მიმართ არის მიპყრობილი.
ამასობაში, ყაზანის „რუბინის“ კიდევ ერთი ლეგიონერი და კვარაცხელიას თანაგუნდელი ჯორჯე დესპოტოვიჩი თვლის, რომ ხვიჩამ ჯერ რუსეთის ჩემპიონატი არ უნდა დატოვოს.
„ხვიჩას ადგილზე არ ვიჩქარებდი და რუსეთში მინიმუმ კიდევ ერთი ან ორი წლით დავრჩებოდი. მას ყველაფერი წინ აქვს და აუცილებლად ექნება წარმატებული კარიერა, რადგან უმაღლესი დონის ფეხბურთელი და პროფესიონალია. ის საუკეთესოა მათ შორის ვისთან ერთადაც ფეხბურთი მითამაშია“ – აღნიშნავს ჯორჯე დესპოტოვიჩი მედიასთან საუბარში.
