გადაწყვეტილი ამბავია. ჯანო ანანიძე თბილისის „დინამოში“ ითამაშებს. ეს ინფორმაცია თავად ქართული ფეხბურთის ფლაგმანმაც ოფიციალურად დაადასტურა.
საქართველოს ნაკრების 28 წლის ნახევარმცველი ბოლო პერიოდში ტრავმებმა გააწამა. ამის გამო მან ეროვნულ გუნდში მსოფლიო ჩემპიონატის საკვალიფიკაციო ეტაპის 3 მატჩიც გამოტოვა და ნაკრებს ვერც 12 ნოემბერს, ერთა ლიგის ფინალში ჩრდ. მაკედონიასთან დაპირისპირების დროს დაეხმარა.
რუსეთიდან წამოსვლის შემდეგ ჯანო ანანიძე დიდხანს უგუნდოდ იყო. ვრცელდებოდა ინფორმაცია თითქოს ის ბათუმის „დინამოში“ ჩაირიცხებოდა, თუმცა საბოლოოდ არჩევანი თბილისის „დინამოზე“ გააკეთა.
ჯანო ანანიძესთან კონტრაქტი 1+1 სისტემით გაფორმდა. ის „დინამოში“ 7 ნომრიანი მაისურით ითამაშებს.
