„ბატონი ზურაბი დანაშაულს არ აღიარებს. იგი იმყოფებოდა აუცილებელი მოგერიების ფარგლებში“, – ამის შესახებ ოლიმპიური ჩემპიონის, ზურაბ ზვიადაურის ადვოკატმა, კახა ცნობილაძემ „ტვ პირველის“ ეთერში განაცხადა.
მისივე თქმით, ყოფილი სპორტსმენი თავდასხმის დროს საკუთარი და ძმის სიცოცხლის გადარჩენას ცდილობდა.
„ბატონი ზურაბი დანაშაულს არ აღიარებს. იგი იმყოფებოდა აუცილებელი მოგერიების ფარგლებში, მართლზომიერად მოქმედებდა და თავდამსხმელი მართლსაწინააღმდეგოდ მოქმედებდა. იძულებული იყო ეს გაეკეთებინა, რათა გადაერჩინა საკუთარი და თავისი ძმის სიცოცხლე.
თვითონ საერთოდ არ იცნობდა თავდამსხმელს, ის იყო მისული იმიტომ, რომ თავისი ძმა გამოეყვანა იქედან, შარს აერიდებინა, მაგრამ ვერ მიუსწრო და ვერ შეძლო, მისვლა დაუგვიანდა, იმიტომ, რომ თავდამსხმელი უკვე ავტომატურ იარაღს ისროდა“, – აცხადებს კახა ცნობილაძე.
შეგახსენებთ, რომ ზურაბ ზვიადაური კახეთში მომხდარი სისხლიანი გარჩევის საქმეზე განზრახ მკვლელობის ბრალდებით დააკავეს. ოლიმპიურ ჩემპიონს ბრალს ოფიციალურად დღეს, დღის მეორე ნახევარში წარუდგენენ.
