მილანის ინტერმა ოფიცილურ ვებ-გვერდზე დაადასტურა, რომ სუპერ ლიგის პროექტში მონაწილეობას აღარ მიიღებს.
„ჩვენი გუნდი მუდამ იღწვის, რომ გულშემატკივარს საუკეთესო ფეხურთის გამოცდილება გაუზიაროს. კლუბის დაარსების დღიდან ინოვაცია და ინკლუზიურობა და ჩვენი დნმ-ის ნაწილია. ჩვენი კავშირი ყველა დაინტერესებულ მხარესთან, რომელიც საფეხბურთო ინდუსტრიის გაუმჯობესებაზე ზრუნავს, არასოდეს შეიცვლება.
ინტერს მიაჩნია, რომ ფეხბურთი, ისევე როგორც ნებისმიერი სხვა ინდუსტრია, მოტივირებული უნდა იყოს მუდმივად გააუმჯობესოს კონკურენცია ფინანსური მდგრადობის პრინციპის ფარგლებში, რათა არ დაკარგოს გულშემატკივართა ინტერესი მთელი მსოფლიოს მასშტაბით.
ამ ხედვით ვიმედოვნებთ, რომ განვაგრძოთ თანამშრომლობა ინსტიტუტებთან და ყველა დაინტერესებულ ორგანიზაციასთან სპორტის მომავლისთვის, რომელიც ყველას ძალიან გვიყვარს”, – ვკითხულობთ „ნერაძურის“ განცხადებაში.
რაც შეეხება ტურუნის იუვენტუსს, განცხადება მათაც გაავრცელეს, თუმცა შინაარსით ინტერისგან კარდინალურად განსხვავებული.
„ჩვენ ვიცით, რომ ზოგიერთი კლუბი ტურნირის შემადგენლობის დატოვებას აპირებს, თუმცა ამ საკითხზე გუნდების მიერ დადებული ხელშეკრულებით გათვალისწინებული აუცილებელი სამართლებრივი პროცედურები ჯერ არ დასრულებულა.
ამ ვითარებაში, ჩვენ პროექტის სპორტული, კომერციული და იურიდიული ძალისადმი რწმენას ვიტოვებთ, მაგრამ ახლა მისი განხორციელების შანსი მცირეა.
იუვენტუსი რჩება კლუბისთვის და მთელი საფეხბურთო ინდუსტრიისთვის გრძელვადიანი ღირებულების შექმნის ერთ-ერთ ინიციატორად,”– ნათქვამია „იუვეს“ განცხადებაში.
როგორც ხედავთ, ტურინელებმა ჯერ-ჯერობით კონკრეტული განცხადების გაკეთებისგან თავი შეიკავეს და მოვლენების განვითარებას ელოდებიან. გუნდის პრეზიდენტი ანდრეა ანიელი სუპერ ლიგის შექმნის ერთ-ერთი მთავარი ინიციატორია და მისი ვიცე-პრეზიდენტიც უნდა გამხდარიყო.
ჯერჯერობით უცნობია მილანის პოზიცია, თუმცა ვარაუდობენ, რომ ისინი თანაქალაქელ ინტერს მიბაძავენ და ლიგას მალე დატოვებენ.
