ინგლისური გამოცემა Tbrfootball იმ ინფორმაციას ეხმაურება, რომლის მიხედვითაც „ლიდს იუნაიტედი“ ხვიჩა კვარაცხელიას ტრანსფერით არის დაინტერესებული, თავად ფეხბურთელი კი იურგენ კლოპის „ლივერპულში“ თამაშის სურვილს გამოთქვამს.
გამოცემის ცნობით, ქართველი ფეხბურთელის სატრანსფერო ფასი 17,5 მილიონი ფუნტ-სტერლინგია:
„მოლაპარაკებები მიმდინარეობს. 17.5 მილიონი ფუნტის ღირებულების ნახევარმცველი ამბობს, რომ „ლიდსს“ ესაუბრა, თუმცა იურგენ კლოპთან თამაში სურს. ახალგაზრდა თავდამსხმელმა გულშემატკივრები რუსეთის პრემიერ ლიგაში აღაფრთოვანა. უფრო მეტიც, მან უკვე თავისი ქვეყნის ეროვნულ ნაკრებში ითამაშა და სამჯერ გაიტანა. ის აშკარად მაგიურად მოქმედებს და მხოლოდ უკეთესი გახდება. მისმა სახელმა მრავალი დიდი კლუბის ყურადღება მიიპყრო“, – წერს გამოცემა.
Tbrfootball „ლიდს იუნაიტედს“ ხვიჩას მიმართ სიფრთხილის გამოჩენას ურჩევს:
„მაგრამ ღირს ასეთი დიდი თანხის საფასურად კვარაცხელიას ტრანსფერი? ძნელი სათქმელია. ქართველი შემტევი მთავარ როლს ასრულებს იმ დონეზე, რომელზეც თამაშობს, მაგრამ შეუძლია თუ არა ინგლისის პრემიერლიგის ფეხბურთის საფეხურზე ასვლა? ეს უცნობია, ფასის გათვალისწინებით კი რისკია“.
