სერბეთის დედაქალაქ ბელგრადში გამართულ 23-წლამდე მოჭიდავეთა მსოფლიოს ჩემპიონატზე 63 კილოგრამ წონით კატეგორიაში მოასპარეზე ლერი აბულაძემ ოქროს მედალი მოიპოვა. ახალგაზრდა სპორტსმენმა ფინალში თურქი მეტოქე დაამარცხა და მსოფლიო ჩემპიონობაც დამსახურებულად იზეიმა.
მიუხედავად პატარა ასაკისა, ლერიმ უკვე მოასწრო დიდებს შორის მსოფლიო ჩემპიონატზე ვერცხლის მედლის, „სენიორთა“ შორის მსოფლიო პირველობაზე ოქროს მედლის, ევროპის ჩემპიონატზე კი ბრინჯაოს მედლის მოპოვება. ახლა კი მის კოლექციას 23-წლამდელებს შორის პლანეტის პირველობაზე აღებული ოქროს მედალიც შეემატა.
22 წლის მოჭიდავემ მსოფლიო ჩემპიონობის შედეგად განცდილი ემოციები „პრაიმ სპორტის“ გუნდს დაუზიარა.
– დავიწყოთ ყველაზე მთავარით. როგორი შეგრძნებაა იყო მსოფლიოს ჩემპიონი?
– უკვე მეორედ მოვიპოვე მსოფლიოს ჩემპიონის ტიტული და თითქოს ნაცნობი განცდაა, გრძნობ რომ რაღაც მნიშვნელოვანი მოხდა შენს ცხოვრებაში. ძალიან ბედნიერი ვიყავი… იმ მომენტში სრულად ვერ აღიქვამ რეალობას, შემდეგ უფრო აანალიზებ რაც მოხდა და უფრო ბედნიერი ხდები.
– შემართება როგორი იყო?
– 20 დღის წინ, დიდებში ვიჭიდავე მსოფლიოს ჩემპიონატის ფინალი და დაძაბულ შეხვედრაში დავმარცხდი, ამიტომ ამ მსოფლიოს ჩემპიონატზე უფრო მოტივირებული ვიყავი, ასე ვთქვათ ფავორიტის რანგში და გავამართლე კიდეც ყველას იმედები.
– როგორ ფიქრობ, შენს წარმატებაში მთავარი წვლილი ვინ შეიტანა?
– განსაკუთრებული მადლობა ექიმებს უნდა გადავუხადო. ასევე, ჩემს პირად მწვრთნელებს, ნაკრების მწვრთნელებს და მთლიან გუნდს. მათი დამსახურებაა, რომ წელს ჩემს ქვეყანას 3 მედალი მოვუტანე, მათ შორის ოქროს მედლებიც.
– რა არის შენი მოტივაცია?
– განსაკუთრებულ მოტივაციას რა თქმა უნდა ჩემი საყვარელი ადამიანები მაძლევენ, რომლებსაც ჩემი იმედი ყოველთვის აქვთ.
– რა არის შენი მიზნები უახლოეს მომავალში?
– როგორც ყველა სპორტსმენის, ისე ჩემი ოცნებაც და მიზანიც ოლიმპიური ჩემპიონობაა.
– შენთვის მისაბაძი მოჭიდავე?
– უამრავი სპორტსმენია მთელი მსოფლიოს მასშტაბით. ასე, ერთის გამოყოფა გამიჭირდება, ყველა მოჭიდავეს აქვს თავისი ძლიერი მხარე. ალბათ ჩემთვის ამ ყველა ძლიერ მხარეს მაინც რომან ვლასოვი აერთიანებს.
– რას ეტყოდი ახალგაზრდა მოჭიდავეებს?
– ახალგაზრდებს ვეტყოდი, რომ არ დაიზარონ ვარჯიში, იშრომონ და შრომა ყოველთვის დაფასდება.
