მიზანი ყოველთვის ვერ ამართლებს საშუალებას და მუდამ ვერც ბევრი ფულით მიაღწევ სასურველს. ეს კრიშტიანო რონალდუს მაგალითზეც გამოჩნდა, რომელსაც ევრო-დოლარები თავზე საყრელად კი აქვს, მაგრამ არც მეტის გამომუშავება აწყენდა.
ამჯერად საქმე ბურთის გორებას არ ეხება. არახალი ამბავია, რომ სპორტის ნებისმიერ სახეობაში, პორტუგალიელი ფეხბურთელის დარი ვარსკვლავები არაერთ სარეკლამო რგოლებში მონაწილეობენ და ამა თუ იმ ბრენდის სახე გამხდარან.
ამ მხრივ გამონაკლისი არც რონალდუა, თუმცა მორიგ შეთავაზებაზე უარი თქვა. საუდის არაბეთმა სახელგანთქმულ ფეხბურთელს 6 მილიონი ევრო შესთავაზა, რათა ამ ქვეყნის ტურისტული სახე გამხდარიყო. რონალდუმ კი რატომღაც სიტყვა ბანზე აუგდო.
ინფორმაცია პოპულარული ბრიტანული გამოცემა The Telegraph ავრცელებს. მათი თქმით, რონალდუს უარის მიზეზი ის იყო, რომ საუდის არაბეთში ჩასვლა მოუწევდა, ამის დრო კი მას არ ჰქონდა. ვგონებთ ალბათ არც სურვილი.
The Telegraph-ვე ცნობით, იგივე შეთავაზება საუდის არაბეთის მხარემ ლიონელ მესისაც გაუკეთა, თუმცა არგენტინელი ფორვარდი პასუხს ჯერ არ ჩქარობს.
