საქართველოს ნაკრებისა და ტულას “არსენალის” ყოფილი ცენტრალური მცველი გია გრიგალავა შესაძლოა ყაზახეთში გადავიდეს. ინფორმაციას ყაზახური “სპორტ24” ავრცელებს. წყაროს ცნობით, გრიგალავას შეძენით “ასტანაა” დაინტერესებული.
ქართველი ფეხბურთელი ტულას “არსენალში” 2017 წლის იანვრიდან თამაშობდა, 2020/21 წლების სეზონში კი გრიგალავამ კლუბის ღირსება 21 შეხვედრაში დაიცვა. ჩემპიონატის მიწურულს, “უფასთან” შეხვედრაში უხეშობისა და გაძევების გამო, ქართველი მცველი სამმატჩიანი დისკვალიფიკაციით დასაჯეს.
გრიგალავას, რომელსაც საქართველოს ეროვნული ნაკრების მაისურით 34 მატჩი აქვს ჩატარებული, კარიერის დიდი ნაწილი რუსეთში აქვს გატარებული.
