თბილისის დინამოს ოქროს თაობის წარმომადგენელმა და ერთ-ერთმა ლიდერმა, ვლადიმერ გუცაევმა პირველი არხის ეთერში, გადაცემა „ტაიმაუტში“ 1981 წლის 13 მაისი გაიხსენა.
ლეგენდარულმა ფეხბურთელმა იმ გოლზე ისაუბრა, რომელიც მან თასების მფლობელთა თასის ფინალში, „კარლ-ცაისის“ წინააღმდეგ გაიტანა.
„ფინალია და იმედი ყველას გვქონდა, მაგრამ დარწმუნებული არავინ იყო, რომ მაიცდამაინც ჩვენ მოვიგებდით თამაშს. მეტოქე ძალიან ძლიერი გუნდი იყო. მოუგეს „ვალენსიას“, „რომასთან“ ჯერ 3:0 წააგეს და მომდევნო შეხვედრაში 4:0 გაიმარჯვეს, „ბენფიკასთან“ ჯერ 2:0 წააგეს, შემდეგ 3:0 მოუგეს. მომდევნო წელს, 1980-ში ოლიმპიადა მოიგეს. ძალიან ძლიერი გუნდი იყო, მაგრამ ფინალია, თამაში და უნდა იბრძოლო. ბრძოლის გარეშე ვერაფერს მოიგებ. ჩვენც ვიბრძოლეთ, მოვიგეთ და გავახარეთ მთელი საქართველო.
ყოველთვის წინასწარ მქონდა ხოლმე შეგრძნება, რომ გოლს გავიტანდი, განსაკუთრებით მაშინ, როცა ძლიერ გუნდებს ვხვდებოდით. „ლივერპულთან“ თამაშის წინაც ვთქვი, რომ გოლს გავიტან-მეთქი. „ჰამბურგთანაც“ ვთქვი, შევაგდებ-მეთქი და გავიტანე. ბევრზე არ მქონდა პრეტენზია – ერთი გოლი. გამგზავრებამდე ბაზაზე ედუარდ შევარდნაძე მოვიდა. ვისაუბრეთ. მეუბნება, შენზე გაგებული მაქვს, რასაც ამბობს, აუცილებლად აკეთებსო და რას იტყვიო? ერთ გოლს გავიტან, სხვას ვერაფერს დაგპირდებით-მეთქი. ერთით ნოლს რომ აგებ და დრო გადის, სასწრაფოდ უნდა გაათანაბრო. რაც უფრო ნაკლები დრო რჩება, ჩქარობ, პანიკა გეწყება. ამიტომ ეს გოლი ძალიან მნიშვნელოვანი იყო. მინდა, რომ რამაზ შენგელიას ვუთხრა დიდი მადლობა. საერთოდ, მე ძალიან ძლიერი პარტნიორები მყავდა. მაღალი დონის ოსტატები იყვნენ. გახსოვთ ხომ, რა გააკეთა რამაზმა. ორი მცველი გადაიყვანა თავის მხარეს, მომცა პასი და იქ უკვე უბრალოდ ბედი იყო და უნდა გაგეტანა“, – განაცხადა გუცაევმა.
შეგახსენებთ, რომ თბილისის „დინამოს“ ევროპული ტრიუმფიდან 40 წელი გავიდა. 1981 წლის 13 მაისს დინამოელებმა თასების მფლობელთა თასის ფინალში გერმანული „კარლ-ცაისი“ 2:1 დაამარცხეს და ისტორიული ტიტული მოიპოვეს. გერმანელების კარში გოლები ვლადიმერ გუცაევმა და ვიტალი დარასელიამ გაიტანეს.
