ცოტა ხნის წინ დავწერეთ, რომ ტელეკომპანია POSTV-ს ინფორმაციით, თბილისის დინამოს მთავარმა მწვრთნელმა, ჩისკომ თანამდებობა დატოვა.
ესპანელის შემცვლელად თბილისურ კლუბში გიორგი ნემსაძეს განიხილავენ, რომელიც ამჟამად გორის „დილას“ დამრიგებელია.
ამ თემასთან დაკავშირებით ჩვენ თავად გიორგი ნემსაძეს დავუკავშირდით, რომელმაც გავრცელებული ჭორი ნახევრად დაადასტურა:
ჯერჯერობით ისევ გორში ვარ. დინამოს ხელმძღვანელებთან ერთი შეხვედრა გვქონდა, მაგრამ ჯერჯერობით არაფერი გადაწყვეტილა. ველოდები ოფიციალურ წინადადებას. თუ კლუბი ოფიციალურ შეთავაზებას გააკეთებს მზად ვარ დინამოში მოსასვლელად. თუ კლუბს დავჭირდები და დამიძახებს მისი ვიქნები! – განაცხადა გიორგი ნემსაძემ.
ამ თემასთან დაკავშირებით, საქართველოს ყველაზე ტიტულოვანი კლუბი ჯერჯერობით დუმს და ოფიციალური განცხადება არ გაუვრცელებია.
შეგახსენებთ, რომ ჩისკო მუნიოსი დინამო თბილისში ორჯერ მუშაობდა და გუნდს ეროვნული ლიგა მოაგებინა. მისი ხელმძღვანელობით გუნდის (ისტორიაში!) ერთ-ერთ ცუდ მოგონებად ფარერულ კლაკსვიკთან 6:1 მარცხი სახელდება, რომლის შემდეგაც გუნდის ხელმძღვანელობამ მას ნდობა გამოუცხადა და 1გუნდში 3 წლით დატოვა“, თუმცა როგორც ჩანს წასვლა თავად ესპანელმა გადაწყვიტა.
როგორც ამბობენ მისი მომავალი სამუშაო ადგილი ინგლისის ჩემპიონშიფის უოტფორდი იქნება…
ავტორი: კახა ბერიძე
