ეშლი ბარტი მაიამის მასტერსის გამარჯვებულია. ავსტრალიელი ჩოგბურთელისთვის ამ ტურნირს ორმაგი დატვირთვა ჰქონდა. იყო საშიშროება, რომ მას პირველი ჩოგნის სტატუსი დაეკარგა. ეს იმ შემთხვევაში მოხდებოდა თუ ბარტი ფინალში ვერ გავიდოდა, ხოლო ნაომი ოსაკა ტურნირს მოიგებდა.
ჩემპიონობა კი არა, იაპონელი ჩოგბურთელი საერთოდ ფინალამდეც ვერ მივიდა და ბარტიმაც ერთი ამოსუნთქვა ამოისუნთქა. მეორე მნიშვნელოვანი ფაქტორი კი ეშლისთვის ის გახლდათ, რომ მაიამის მასტერსის მოქმედი ჩემპიონი იყო და ბუნებრივია ტიტულის დაცვა ეწადა.
საბოლოოდ ასეც მოხდა. ეშლი ბარტი ფინალამდე ერთი ამოსუნთქვით მივიდა, იქ კი კანადელ ბიანკა ანდრეესკუს მარტივად აჯობა. პირველი სეტი ბარტიმ 6:3 მოიგო, ხოლო მეორე პარტიაში 4:0 მიჰყავდა, როდესაც მეტოქემ მატჩის გაგრძელებაზე ტრავმის გამო უარი თქვა.
ეშლი ბარტიმ მაიამიში ჩემპიონობით 1000 სარეიტინგო ქულა და 300 ათასი დოლარი გამოიმუშავა. ყველაფერთან ერთად ის კვლავ მსოფლიოს პირველი ჩოგანია.
