რომის მასტერსზე, მოქმედმა ჩემპიონმა ნოვაკ ჯოკოვიჩმა უდაძაბულეს თრილერში სტეფანოს ციციპასი დაამარცხა და ნახევარფინალში გავიდა.
სერბი და ბერძენი ჩოგბურთელების ჯახი 3 საათს და 18 წუთს გაგრძელდა. ჯოკოვიჩმა მართლაც რომ ბეწვის ხიდზე გაიარა, რადგან წაგებასთან ძალიან ახლოს იყო, თუმცა მსოფლიოს პირველი ჩოგანი ხომ შემთხვევით არ არის და ციციპასთანაც კორტი გამარჯვებულმა დატოვა – 4:6, 7:5, 7:5.
ამასობაში, ყველაფრის მთვლელმა და მოკირკიტე სტატისტიკოსებმა დაადგინეს, რომ ნოვაკ ჯოკოვიჩს ამ მატჩში არაჩვეულებრივი რეკორდიც დაუმყარებია. სერბს ჯამში 23 ბრეიქპოინტი ჰქონდა, რომელთაგანაც 6 გამოიყენა, თუმცა რეკორდის არსი სხვა რამეში მდგომარეობს.
სწორედ ეს ციფრი – 23 გამოდგა უნიკალური მიღწევის მაჩვენებელი. ნოლეს, 3 სეტიან მატჩებში, ტოპ ხუთის ჩოგბურთელებთან ასეთი რაოდენობის ბრეიქპოინტები აქამდე არასოდეს ჰქონია.
ნოვაკ ჯოკოვიჩი რომის მასტერსის ნახევარფინალში ზედიზედ მერვედ გავიდა, ხოლო თავისი დიდებული კარიერის მანძილზე მასტერსებზე 71-ედ შეეცდება ფინალში გასვლას.
