საქართველოს მოქმედი ჩემპიონი თბილისის „დინამო“ თურქული შეკრებიდან სამშობლოში დაბრუნდა. გიორგი ნემსაძის გუნდმა ბელეკში საერთო ჯამში 8 შეხვედრა გამართეს, საიდანაც 2 მოიგეს, 1 ფრედ ითამაშეს, 5 კი წააგეს.
თბილისური კლუბი წინასასეზონო მზადებას უკვე საქართველოში განაგრძობს. „პრაიმსპორტი“ თურქული შეკრების შესაფასებლად „დინამოს“ მთავარ მწვრთნელს, გიორგი ნემსაძეს დაუკავშირდა:
– ნაყოფიერი შეკრება გამოგვივიდა. რა თქმა უნდა, კარგი იქნებოდა ამხანაგურ მატჩებში შედეგი უკეთესი გვქონოდა, მაგრამ ამის გამო ტრაგედიას არ ვქმნით. მთავარი იყო ტაქტიკური მონახაზები დაგვეხვეწა, ფიზიკური კონდიციები გაგვეუმჯობესებინა და ზოგადად, ეროვნული ჩემპიონატისთვის სრულფასოვანი მზადება გაგვევლო. სასიამოვნო განცდა იყო, რომ შეკრება მაინც მოგებით დავასრულეთ და უკრაინული გუნდი დავამარცხეთ.
– ლეგიონერებზე რას გვეტყვით? რამდენად კმაყოფილი დარჩით?
– ერთი ხორვატი ფეხბურთელი უკან გავაბრუნეთ. მისით კმაყოფილი არ დავრჩი. სხვებმა მეტ-ნაკლებად თავი კარგად წარმოაჩინეს.
– დინამოში სხვა სიახლეებს ხომ არ უნდა ველოდოთ?
– დასამალი არაფერია. გეტყვით, რომ ამ დღეებში ორ ლეგიონერს კიდევ ველოდებით. გვინდა ფორვარდით გავძლიერდეთ და ნახევარდაცვაც გავამყაროთ. ლეგიონერების ვინაობას ჯერ ვერ გაგიმხელთ, ორ-სამ დღეში ყველაფერი გასაჯაროვდება. მოკლედ, ეროვნულ ჩემპიონატს წელში გამართულები შევხვდებით.
