ალბათ შეამჩნევდით ბოლო დღეებში ნაპოლის მთავარი მწვრთნელის, ჯენარო გატუზოს თვალის მდგომარეობას, რომელიც ჩვეულ კონდიციებს ნამდვილად არ ჰგავდა.
ცნობილი ფაქტია, რომ გატუზო აუტოიმუნური დაავადება – მიასთენიათია დაავადებული. ეს დიაგნოზი მას 10 წლის წინ დაუსვეს, თუმცა ეს, 42 წლის სპეციალისტს თავის საქმიანობაში ხელს არ უშლის.
გუშინ, ტორინოსთან გამართული მატჩის შემდეგ გამართულ პრესკონფერენციაზე იტალიელმა ჟურნალისტებმა გატუზოს ამ დაავადების და საკუთარი ჯანმრთელობის მდგომარეობის შესახებ ჰკითხეს, რაზეც რინომ ასე უპასუხა:
„ვაღიარებ, რომ ბოლო 12 დღის განმავლობაში მძიმედ ვიყავი. ჩემი მდგომარეობა განსაკუთრებულად 2-3 დღის წინ დამძიმდა, მაგრამ ახლა უკეთ ვარ. ბიჭებმაც ძალიან განიცადეს ასეთ მდგომარეობაში რომ დამინახეს, მაგრამ ცოცხალი ვარ. უკვე 10 წელია რაც ეს დაავადება მაქვს და ექიმები სულ იმას მეუბნებიან, რომ დიდი დრო არ დამრჩა, მაგრამ ამ დრომდე ცოცხალი ვარ და აქ ვარ, თქვენთან. შეტევა სამჯერ მქონდა, მაგრამ განსაკუთრებულად მძიმე ბოლო იყო, 2-3 დღის წინ. თვალი ასეთ მდგომარეობაში დამიტოვა, მაგრამ ამ დაავადებას ეს ახასიათებს, მალე გამივლის. ერთი რამ მინდა იცოდეთ – მე თუ მოვკვდები, მოვკვდები მხოლოდ მოედანზე, იქ, სადაც მთელი ცხოვრება გავატარე. ამ ეტაპზე დაავადების სიმძიმემ გადაიარა და თავს კარგად ვგრძნობ. მხოლოდ ჩემნაირი გიჟი თუ დაუბრუნდებოდა ამ მდგომარეობაში თავის საქმიანობას. დარწმუნებული ვარ, ახლაც არსებობენ ისეთი ადამიანები, რომლებსაც ჰგონიათ, რომ დიდი ხნის სიცოცხლე არ დამრჩა, მაგრამ გარწმუნებთ, კარგად ვარ. მე მხოლოდ ფეხბურთის მოედანზე მოვკვდები“, – განაცხადა გატუზომ.
მიასთენია აუტოიმუნური ხასიათის ნერვულ-კუნთოვანი დაავადებაა, რომელსაც კუნთების პათოლოგიური სისუსტე და დაღლილობა ახასიათებს.
