უკვე წელიწადია კაცობრიობას განსხვავებულ რეალობასთან უწევს შეგუება. კორონავირუსის პანდემიამ სამყარო შეცვალა და შეცვალა წეს-ჩვეულებებიც. ასეა სპორტშიც. ზოგიერთი მსხვილი ტურნირი გადაიდო ან საერთოდ გაუქმდა, ხოლო რაც მაინც იმართება, მკაცრი რეგულაციებით.
2020 წელს, სამეფო სპორტმა უიმბლდონი მოისაკლისა. იყო საშიშროება, რომ წლეულს ავსტრალიის ღია პირველობაც ჩაშლილიყო, თუმცა საბედნიეროდ ის მაინც გაიმართება. მართალია, ყველა წინამორბედისგან განსხვავებული იქნება და ჩოგბურთელებიც მკაცრი კონტროლის ქვეშ იქნებიან, მაგრამ მთავარია, რომ მაინც ჩატარდება. უფრო მეტიც – ტრიბუნები ცარიელი არ იქნება და შეზღუდული რაოდენობით, თუმცა მაყურებელი მას დაესწრება.
ორგანიზატორების მიერ შემუშავებული რეგულაციების მიხედვით, მოთამაშეებს კარანტინის გავლა მოუწევთ და მელბურნში ყოფნის პერიოდში თავისუფლადაც ვერ გაადგილდებიან. მათ, სხვადასხვა პროცედურებისთვის დროც მკაცრად ექნებათ განსაზღვრული, სასტუმროშიც იზოლირებულად იცხოვრებენ.
ამ გარემოებით შეწუხებულია უკრაინელი ჩოგბურთელი ელინა სვიტოლინა, რომელსაც ავსტრალიაში ყოფნის პერიოდში შეყვარებულთან – გაელ მონფისთან დაშორება მოუწევს.
„ტურნირის გაუქმებას, რა თქმა უნდა მისი კარანტინის პირობებში გამართვა ჯობდა. რთული იქნება, მაგრამ სხვა გზა არ გვაქვს, უნდა შევეგუოთ. ისე, ერთი მხრივ საინტერესოა და სპეციფიურ გამოცდილებას მივიღებთ.
ყველაზე მეტად ჩემს ბიჭთან დაშორება მეწყინა. ავსტრალიის ღია პირველობის ორგანიზატორებისგან ოფიციალური წერილი მივიღეთ, სადაც წერია, რომ წყვილებს მელბურნში ყოფნის დროს ერთმანეთთან ურთერთობა ეკრძალებათ, რათა კონტაქტების წრე არ გაფართვდეს. ეს კანონი ავსტრალიის ხელისუფლებამ მიიღო.
ყველაზე რთული გადასატანი კი ის იქნება, რომ ორივე ერთად ვიქნებით, ერთ ქალაქში, ერთ სასტუმროში, ერთ ლოკაციაზე, მაგრამ ერთმანეთს ვერ მივუახლოვდებით. ისე კი იმედი მაქვს, თვითონ ტურნირი ჩემთვის წარმატებული გამოდგება“ – ამბობს ელინა სვიტოლინა.
