ცუდი პერიოდი უდგას გაელ მონფისს. ფრანგი ჩოგბურთელი, რომელიც არც ისე შორეულ წარსულში მსოფლიოს ათეულშიც შედიოდა, აგერ უკვე 11 თვეა მოგების გემო რა არის არ იცის.
გაელ მონფისმა, რომელიც უკრაინელი ჩოგბურთელის ელინა სვიტოლინას სატრფოცაა, ზედიზედ მეშვიდე მატჩი წააგო. ფრანგი, ავსტრალიის ღია პირველობას საწყის ეტაპზევე გამოეთიშა. მან ფინელი ემილ რუუსუვორის წინააღმდეგობა ვერ დაძლია და დაძაბულ, 5 სეტიან დაპირისპირებაში წააგო.
გაელ მონფისმა ემოციები ვერც პრესკონფერენციაზე მოთოკა და ატირდა.
„ისევ დავმარცხდი. თავდაჯერებულობა მაკლია. წაგებით ვის არ წაუგია, მაგრამ ახლა არც ის ვიცი ეს როდემდე გაგრძელდება. ადრე, კორტზე თავს გაცილებით მყარად და ძლიერად ვგრძნობდი. ვატყობ, რომ ამ მხრივ პრობლემები მაქვს.
მიჭირს ჩაწოდება, ვუშვებ ბევრ ორმაგ და უნებლიე შეცდომას, გათამაშებების დროს კორტის ხაზიდან 6 მეტრის მოშორებით ვიმყოფები. მოკლედ, კორტზე დაძაბული ვარ და თქვენ ამას ამჩნევთ.
ყველაზე ცუდი ის არის, რომ ყოველდღიურად ბევრს ვშრომობ, ხანდახან ძაღლივითაც, მაგრამ ეს არ მშველის. მინდა რომ ეს კოშმარული პერიოდი დასრულდეს“ – ამბობს თვალცრემლიანი გაელ მონფისი.
ფრანგს, მიმდინარე ავსტრალიის ღია პირველობაზე ისღა დარჩენია, თავის გულის სწორს, ელინა სვიტოლინას უქომაგოს.
