მორიგი ნაბიჭი ჩემპიონობისკენ! – დინამო ბათუმმა საბურთალო გაანადგურა

ეროვნული ლიგის 32-ე ტურის მატჩში ბათუმის “დინამომ” შინ თბილისის “საბურთალო” მიიღო და გამანადგურებელი ანგარიშით 4:0 დაამარცხა.

შეხვედრის მე-13 წუთზე ვლადიმერ მამუჩაშვილმა მასპინძლები თერთმეტმეტრიანი დარტყმით დააწინაურა. მატჩის 39-ე წუთზე მამუკა კობახიძემ თავური დარტყმით სხვაობა ორამდე გაზარდა.

გია გეგუჩაძის გუნდმა მეორე ტაიმში მეტოქეზე ზეწოლა გააძლიერა, შეხვედრის 57-ე წუთზე ვლადიმერ მამუჩაშვილის საგოლე გადაცემას მამუკა კობახიძე გამოეხმაურა და დუბლი გაიფორმა. შეხვედრის 87-ე წუთზე კი თორნიკე გაფრინდაშვილმა მასპინძელთა უპირატესობა 4-მდე გაზარდა და შეხვედრის საბოლოო ანგარიში დააფიქსირა.

32 ტურის შემდეგ ბათუმური გუნდი 67 ქულით პირველ ადგილს იკავებს და ჩემპიონობამდე ძალიან ცოტა აშორებს, თბილისის “საბურთალო” კი მე-4 ადგილზე იმყოფება.

გია გეგუჩაძის გუნდი მომდევნო ტურში თბილისის “ლოკომოტივს” დაუპირისპირდება, ხვიჩა შუბითიძის გუნდი კი თელავს ესტუმრება.