შვეიცარიის ქალაქ ნიონში მდებარე უეფას შტაბბინაში, ახალი საკლუბო ტურნირის, კონფერენს ლიგის პირველი საკვალიფიკაციო ეტაპის წილისყრა გაიმართა, სადაც სამი ქართული კლუბის მეტოქეები გაირკვა.
კონფერენს ლიგის პირველ საკვალიფაკაციო ეტაპზე საქართველოს ვიცე-ჩემპიონი „დინამო ბათუმი“ სან მარინოს ტრე პენეს დაუპირისპირდება. გია გეგუჩაძის გუნდი პირველ მატჩს შინ გამართავს.
მესამეადგილოსან გორის „დილას“ სლოვაკური ჟილინა შეხვდა. ანდრი დემჩენკოს შეგირდები პირველ შეხვედრას სტუმრად ჩაატარებენ.
საქართველოს თასის გამარჯვებული „გაგრა“ მონტენეგროს სუტიესკას დაუპირისპირდება. ეროვნული ლიგა 2-ის გუნდი, რომელსაც გაგა კირკიტაძე წვრთნის, პირველ თამაშს შინ გამართავს.
უეფას კონფერენს ლიგის პირველი საკვალიფიკაციო წრის მატჩები 8 და 15 ივლისს გაიმართება.
უკვე 16 ივნისს კონფერენსლიგის მეორე ეტაპის წილისყრაა დაგეგმილი, რაც იმას ნიშნავს, რომ ქართულ კლუბებს წინასწარ ეცოდინებათ, პირველ წრეში წარმატების შემთხვევაში, მომდევნო ეტაპზე რომელ წყვილში გამარჯვებულთან მოუწევთ შეხვედრა.
2021/22 წლების კონფერენსლიგის ფინალური შეხვედრა 2022 წლის 25 მაისს, ალბანეთის დედაქალაქ ტირანას ეროვნულ სტადიონზე გაიმართება.
