“დინამო ბათუმი” უეფას კონფერენსლიგას გამოეთიშა. მე-3 საკვალიფიკაციო ეტაპის საპასუხო მატჩში დინამო ბათუმი სივასპორს თურქეთში ესტუმრა, გუნდს, რომელსაც 20-მატჩიანი წაუგებელი სერია ჰქონდა.
პირველ ნახევარში გუნდებს მეტ-ნაკლებად სახიფათო მომენტი ჰქონდათ. ბათუმელებმა ტაიმის ბოლო წუთზე უპასუხეს მეტოქეს და სწრაფ კონტრშეტევას ფლამარიონ ჯოვინო ასრულებდა, თუმცა, ბრაზილიელმა ხელსაყრელი ვითარებიდან საკმაოდ არაზუსტად დაარტყა.
მე-2 ტაიმის საწყის წუთებში თამაშის სცენარი არ შეცვლილა და გუნდებს მომენტების შექმნა ისევ უჭირდათ. თუმცა, 63-ე წუთზე გიორგი ფანცულაიამ მარჯვენა ფლანგზე ფანტასტიკურად ითამაშა, რამდენიმე მეტოქე მოატყუა და უძლიერესად დაარტყა, მაგრამ ბურთი კარს აცდა, დამატებაზე ჯოვინოს შეეძლო გატანა, თუმცა, ბრაზილიელმა ისევ ცუდად დაარტყა და მომენტი გამოუყენებელი დარჩა.
78-ე წუთზე სანდრო ალთუნაშვილმა მოედნის ცენტრიდან ბრწყინვალე პასით სივასპორის ნახევარდაცვა და დაცვა უსაქმოდ დატოვა და შეტევაში ბენჟამენ ტეიდი ჩაერთო, რომელმაც თავის მხრივ პასით ფანცულაია მოძებნა და გიორგიმ პრაქტიკულად ცარიელ კარში ზუსტად დაარტყა -0:1. დინამო ბათუმი დაწინაურდა და ორი მატჩის ჯამში ანგარიში გაათანაბრა.ძირითად დროში აღარაფერი შეცვლილა და გამარჯვებულის გამოსავლენად დამატებით დრო დაინიშნა. თურქებმა ზეწოლა გაზარდეს და 110-ე წუთზე გაათანაბრეს. შეტევა ალავიძემ მოიგერია, მაგრამ დამატებაზე ჟორჟე ფელიქსმა ყველას დაასწრო და მისი გუნდისთვის მნიშვნელოვანი გოლი გაიტანა.
სამწუხაროდ, ბათუმური კლუბი ორი მატჩის ჯამში ანგარიშით 3:2 დამარცხდა და კონფერენს ლიგას გამოეთიშა.
