საქართველოს ნაკრების კაპიტანი, ჯაბა კანკავა „ტობოლის“ ფანებს დაემშვიდობა. 34 წლის ფეხბურთელის გამოსამშვიდობებელი წერილი ყაზახური კლუბის ვებ-გვერდმა გაავრცელა.
„მინდა მადლობა გადავუხადო ტობოლს ბოლო სამი სეზონისთვის. ამ პერიოდის განმავლობაში, კლუბმა მნიშვნელოვანი ნაბიჯები გადადგა წარმატებისკენ და ტიტული მოიგო. ამაყი ვარ, რომ ამაში გარკვეული წვლილი მეც შევიტანე.
ძალიან დიდ მადლობას ვუხდი ტობოლის გულშემატკივრებს. მათ კლუბში გადმოსვლის დღიდან თბილად მიმიღეს და ბოლომდე გვერდში მედგნენ. დიდი მადლობა თითოეულ მათგანს თბილი სიტყვებისა და კეთილი სურვილებისთვის.
წარმატებებს ვუსურვებ კლუბს მომავალში, განსაკუთრებით ახალ ევროტურნირზე. ჩემთვის უდიდესი ბედნიერება იყო „ტობოლში“ თამაში და ყველა მატჩში მხოლოდ მაქსიმუმს ვდებდი. მადლობა ყველაფრისთვის“, – ამბობს კანკავა.
ჯაბა კანკავამ ტობოლი მიმდინარე წლის ზამთარში დატოვა. ქართველი ფეხბურთელი სეზონის ბოლომდე საფრანგეთის ლიგა 2-ის კლუბ „ვალანსიენის“ ღირსებას დაიცავს.
