რამდენიმე კვირის წინ, „პრაიმ სპორტმა“ ახალგაზრდა გამომგონებლის, გიორგი მიქიაშვილის შესახებ გიამბოთ, რომელმაც საბრძოლო სახეობებში კრივის ტომრის და რინგის ინოვაციური ტექნოლოგია გამოიგონა. კერძოდ, ტომარა ოთხად იშლება, რომელზეც ვარჯიში 4 ადამიანს შეუძლია, რაც შეეხება რინგს, ის ოთხ ზომაზე დიდდება და გამოყენება როგორც დიდი ზომის დარბაზში, ისე მცირე ზომისაშიც შესაძლებელი ხდება. ეს ყველაფერი გიორგი მიქიაშვილს ესპანეთში და საქართველოში აქვს დაპატენტებული, რაც სახუმარო ამბავი ნამდვილად არ არის. გიორგი ერთადერთი ქართველია, რომელმაც ესპანეთის ტერიტორიაზე გამოგონების დაპატენტება შეძლო.
ახალი და სასიხარულო ამბავი კი ის არის, რომ გიორგის თავისი გამოგონება, კერძოდ ინოვაციური რინგი სეულის საერთაშორისო გამოფენაზე ჰქონდა გატანილი, სადაც მონაწილეობას 50 ქვეყანა იღებდა. გიორგი მიქიაშვილს გამოგონებამ გამოფენაზე მესამე ადგილი დაიკავა, რაც ნამდვილად უდიდესი წარმატებაა.
ახალგაზრდა გამომგონებელმა „პრაიმ სპორტთან“ აღნიშნული წარმატების შესახებ ისაუბრა:
„კორეაში, სეულის საერთაშორისო გამოფენაზე , სადაც 50 ქვეყანა მონაწილეობდა, ჩემმა გამოგონებამ – ინოვაციურმა რინგმა მესამე ადგილი დაიმსახურა. ეს გამოფენა ჩემთვის იყო პირველი და პირველივეზე ბრინჯაოს მედალი ავიღე. აღსანიშნავია რომ, კორეა ინოვაციების და ტექნოლოგიების კუთხით მსოფლიოს პირველ ათეულში შედის. მინდა დიდი მადლობა ვუთხრა საერთაშორისო დონის ცნობილ ქართველ გამომგონებელს, ჩემს მენტორს და უფროს მეგობარს ბატონ ომარ ბილონაშვილს! ბატონმა ომარმა 2021 წლის აგვისტოში საქართველოში დამაპატენტებინა ეს ინოვაციური რინგი (რომელიც 4 ზომაზე დიდდება და არის ძალიან პრაქტიკული) და შემდეგ უჩუმრად (ჩემთვის სიურპრიზად) სხვა ქართველების გამოგონებებთან ერთად გაიტანა ჩემი გამოგონებაც ამ გამოფენაზე. მართალია სეულში საქართველოდან 6 გამოგონება იყო წარდგენილი, მაგრამ მხოლოდ ერთი მედალი დავიმსახურეთ და ისიც ჩემმა გამოგონებამ.
დაიწყო 2022 წელი და მეც ვიწყებ ჩემი ახალი გამოგობებების საქართველოში/ესპანეთში და ევროპაში დაპატენტებას, ასევე საერთაშორისო გამოფენებზე გატანას. ბევრი კავშირების მიუხედავად, ამ გამოგონებების წარმოებით საქართველოში ჯერ არ ინტერესდებიან და თუ ასე გაგრძელდა, ვფიქრობ მომავალში ჩემი გამოგონებების დასაპატენტებლად ხედვას მხოლოდ ესპანეთზე, ან ევროპა-ამერიკაზე შევაჩერებ. ჩემი თითოეული გამოგონების პატენტის ღირებულება ძალიან მაღალია, ზოგი მათგანის ფასი 5-6 და 7 ნულითაც მთავრდება.
ამ ეტაპზე მაქვს 18 ინოვაციური იდეა, აქედან 15 არის სასარგებლო მოდელი (იმაზე უკეთესი რაც უკვე არსებობს) და 3 გამოგონება (ჯერ რომ არ არსებობს მიახლოებითიც კი). ასევე , იმის გამო რომ სტატისტიკის მიხედვით ყოველ 1000 ადამიანში მხოლოდ 1 არის გამომგონებელი და ყველას არ ძალუძს ინოვაციის გამოგონება, ნებისმიერ დაინტერესებულ პირს, ვისაც სურს თავისი საქმიანობის განვითარება, ან ინოვაციური იდეების დანერგვა თავის საქმეში, შეუძლია Facebook-ში დამიკავშირდეს – Inventor Giorgi Miko-ზე და შემიკვეთოს იდეა, რომელსაც თავად, სადაც უნდა იქ დააპატენტებს “, – განაცხადა გიორგი მიქიაშვილმა ჩვენთან საუბრისას.
