საქართველოს კალათბურთელთა ნაკრების კაპიტანმა, თორნიკე შენგელია პირველი არხის ეთერში, გადაცემა „ტაიმაუტში“ სტუმრობისას მის ჯანმრთელობის მდგომარეობაზე ისაუბრა და განაცხადა, რომ მოედანს უეხლოეს დღეებში დაუბრუნდება.
„მუხლი უკეთ მაქვს, ჯერ ბოლომდე აღდგენილი არ არის, რამდენიმე დღეა რაც სირბილი დავიწყე და დღითი დღე უმჯობესდება. დიდი იმედი მაქვს, რომ სადღაც 4-5 დღეში დავიწყებ გუნდთან ერთად ვარჯიშს“, – ამბობს კალათბურთელი.
შენგელიამ საქართველოსა და სერბეთის ნაკრებების დღევანდელ დაპირისპირებაზეც ისაუბრა.
„ბიჭები აუცილებლად ბოლომდე იბრძოლებენ და დაიხარჯებიან, ყველას ვინც იბრძვის აქვს ნებისმიერ გუნდთან გამარჯვების შანსი და რა თქმა უნდა, დღეს ჩვენც გვაქვს შანსი, რომ სერბეთთან გავიმარჯვოთ. არაერთხელ მითქვამს, რომ ჩვენი გუნდი არის ერთი დიდი ოჯახი და ეს ქიმია რაც ჩვენ გვაქვს მოედნის გარეთ ერთმანეთის მიმართ აისახება მოედანზეც და ეს საგრძნობლად ჩანს. ჩემი აზრით, ეს არის ერთ-ერთი ყველაზე დიდი მიზეზი იმისა, რომ დღეს ჩვენ ასეთი წარმატებულები ვართ“, – აღნიშნა თოკომ.
28 წლის კალათბურთელმა მომავალ ევრობასკეტზე და საქართველოს ნაკრების სამომავლო პერსპექტივაზეც ისაუბრა.
„ჩემი ოცნებაა, რომ საქართველოს ნაკრებთან ერთად ოლიმპიადაზე ვითამაშო და ჩემი აზრით, აუხდენელი არ უნდა დარჩეს, რადგან თუ ჩვენ სრული შემადგენლობით ვიქნებით, გვაქვს იმის პოტენციალი, რომ ჯგუფიდან გავიდეთ, შემდეგ მეორე ეტაპზე და როცა მაქსიმუმზე ვსაუბრობთ რატომ არ უნდა ვიფიქროთ მედლებზე. ჩემთვის უბედნიერესი გრძნობა იქნება საქართველოს ნაკრების მაისურით თასის აწევა“, – განაცხადა კალათბურთელთან.
შეგახსენებთ, რომ დღეს, 19:00 საათზე საქართველოს კალათბურთელთა ეროვნული ნაკრები ევრობასკეტის შესარჩევი ეტაპის მე-5 ტურის მატჩში, თბილისის სპორტის სასახლეში სერბეთის ნაკრებს შეხვდება.
