კოშმარული გამოდგა ეროვნული ლიგის მე-11 ტური ქობულეთის „შუქურასთვის“. გიორგი შაშიაშვილის გუნდი „ბათუმთან“ პირწმინდად განადგურდა და არასაფეხბურთო ანგარიშით – 1:8 წააგო.
წყვილის ფავორიტად ბათუმელები კი მიიჩნეოდნენ, მაგრამ ასეთ განავარდებასაც ალბათ არავინ ელოდა. თან იმასაც თუ გავითვალისწინებთ, რომ პირველი წრის შეხვედრა ამ ორ გუნდს შორის ფრედ 1:1 დასრულდა, გულშემატკივარი დღესაც საინტერესო და დაძაბულ ბრძოლას ელოდა.
„შუქურასთვის“ სამწუხაროდ კი მოხდა პირიქით. ქობულეთელები, რომლებიც ზესტაფონში თამაშობდნენ, თუმცა მასპინძლის სტატუსი ჰქონდათ შერცხვნენ და ეს მატჩი რაც შეიძლება მალე უნდა დაივიწყონ, არადა დასაწყისი „შუქურას“ ცუდს თითქოს არაფერს უქადდა. ქობულეთელები მე-15 წუთზე ინგოროყვას გოლით დაწინაურდნენ, თუმცა შემდეგ ბათუმელთა ნამდვილი რისხვა დაატყდათ თავს.
არა გვგონია, მატჩის პერიპეტიების აღწერას აზრი ჰქონდეს. გოლები გია გეგუჩაძის შეგირდთაგან მამუჩაშვილმა, ჯიღაურმა, გროსურეკმა, ფანცულაიამ და ძარიამ გაიტანეს. აქედან ჯიღაურმა და ფანცულაიამ დუბლი მიითვალეს.
