ვეტერანს სპორტსმენები ბევრი გვინახავს და გვსმენია. არის სპორტის სახეობები, სადაც ასაკის მატება სულაც არ ნიშნავს, რომ აუცილებლად კარიერა უნდა დაასრულო. მაგალითაც ტყვიის სროლა, სადაც ჩვენი სახელოვანი სპორტსმენი ნინო სალუქვაძე ისევ აქტიურად ასპარეზობს, ცხენოსნობა, ჭადრაკი და ა.შ.
ჩოგბურთში კი ორმოცს გადაცილებული სპორტსმენები ალბათ თითზე ჩამოსათვლელად თუ მოიძებნებიან. აგერ სულ მალე როჯერ ფედერერი მიუკაკუნებს ამ ზღვარს.
გეილ ფოლკენბერგი კი ალბათ გინესის წიგნში შევა. ჩოგბურთის მოყვარულთ მასზე ალბათ ცოტა თუ სმენია, რადგან დიდი შედეგებისთვის არასოდეს მიუღწევია, მაგრამ პროფესიონალი ჩოგბურთელი კი გახლდათ. თუმცა რატომ წარსულ დროში? ის კვლავ აქტიურ სპორტშია და სულ მალე ფლორიდაში გასამართი ITF-ის ტურნირზეც იასპარეზებს, საკვალიფიკაციო ეტაპზე მსოფლიოს 796-ე ჩოგანს, ტიფანი ფიკეს დაუპირისპირდება.
ასაკს არ იკითხავთ? გეილ ფოლკენბერგი არც მეტი, არც ნაკლები 74 წლის გახლავთ. მისი საუკეთესო შედეგი რეიტინგში 343 პოზიცია იყო. მან პირველად კარიერა 1999 წელს, 52 წლის ასაკში დაასრულა, 2011 წლიდან კი სამეფო სპორტს კვლავ დაუბრუნდა და ITF-ის ტურნირებში მონაწილეობა განაახლა.
2013 წელს, ის ნაომი ოსაკას შეხვდა, რომელიც მაშინ 16 წლის გახლდათ და მშრალადაც, ნულზე წააგო. 2016 წელს, როცა გეილი 69 წლის იყო, გამარჯვება იზეიმა და ალაბამაში ჩატარებული გათამაშების პირველი წრე დაძლია, რასაც ზედიზედ 23 მარცხი მოჰყვა.
