საქართველოს ნაკრების ვეტერანმა ფეხბურთელმა შოთა არველაძემ გადაცემა „სპორტი იმედზე“ სტუმრობისას ლევან კობიაშვილის მიერ გაკეთებულ განცხადებას უპასუხა.
შოთა არველაძემ განცხადება სოციალურ ქსელში გაავრცელა, რომელსაც უცვლელად გთავაზობთ:
„ეროვნული ნაკრების შედეგზე ჩემმა შეფასებამ და შემდეგ გამოხმაურებამ, რომელიც ჩემი მისამართით იყო შეურაცხმყოფელი, დამარწმუნა, რომ არ უნდა მივმართო კონკრეტულ ადამიანს, ჯგუფს ან ორგანიზაციას, არამედ იმ ადამიანებს, ვისთვისაც ეს კომენტარი გავაკეთე.
ამ შეფასებით, ვცადე დისკუსიის გახსნა ფეხბურთში მიმდინარე პროცესების შესახებ, რომელიც ეროვნული ნაკრებით არც იწყება და არც მთავრდება. თუ ჩვენ გავაგრძელებთ პრობლემის ძიებას მხოლოდ ერთ ადამიანში, ან გამოსავალი მხოლოდ ერთი ადამიანის შეცვლა გვეგონება, უკეთეს შედეგს ვერ მივაღწევთ.
უნდა გვქონდეს ჩვენი სტილი, იდეოლოგია, ფილოსოფია, რომელზეც დავაშენებთ ინფრასტრუქტურასაც, აკადემიებსაც, საკლუბო სისტემასაც და მწვრთნელთა განათლებასაც – ეს არის ერთადერთი და სწორი გამოსავალი. დაველოდები გულშემატკივრის შეფასებას და მოვისმენ ნებისმიერ აზრს, რომელიც უფრო გაშლის დისკუსიას და შეგვაძლებინებს ამ პრობლემების მოგვარებას.
„მიხედე რა შენ საქმეს – რას პროფესორობ“ – რაც შეეხება ამ ფრაზას, მინიმუმ არ ვიმსახურებ ასეთ პასუხს და დამოკიდებულებას, თუმცა ამაზე უარესებიც ამიტანია და მომითმენია. ეროვნული ნაკრები კი ის ადგილია, სადაც 15 წელი გავატარე, სადაც ყველაზე მეტი გოლი გავიტანე და არავისზე ნაკლებ გულშემატკივრად არ ვთვლი თავს – ეს გუნდი ყოველთვის იქნება ჩემი საქმე, მოსწონს ვინმეს ეს, თუ არა.“ – განაცხადა შოთა არველაძემ
შეგახსენებთ, რომ ფეხბურთის ფედერაციის პრეზიდენტმა, ლევან კობიაშვილმა გუშინ ტელეკომპანია „იმედის“ ეთერში შოთა არველაძის მწვავე კომენტარს უპასუხა, რომელიც ვეტერანმა ფეხბურთელმა საქართველოს ნაკრების სექტემბრის თამაშებზე გააკეთა.
მიხედე რა შენს საქმეს, რას პროფესორობ – კობიაშვილი არველაძეს | VIDEO
