გიორგი მამარდაშვილის საფეხბურთო აგენტი, ანტონიო ლოპეს-ენტრენა Plazadeportiva-ს ქართველი ფეხბურთელის შესახებ ესაუბრა.
ლოპეს-ენტრენამ განაცხადა, რომ „ვალენსიასთან“ ერთად, გიორგის ყიდვა კატალონიის „ბარსელონასაც“ შესთავაზა.
„1986 წლიდან, აღმოსავლეთ ევროპაში მოგზაურობა ხშირად მიწევს, რა დროსაც ბევრი მეგობარი შევიძინე და ასევე ბევრი კონტაქტიც დამიგროვდა. ლევან სეთურიძე მეხმარება ქართველი ფეხბურთელების შესახებ ინფორმაციის მოძიებაში. სწორედ მან გამაფრთხილა გიორგი მამარდაშვილის შესახებ, რომ იყო თბილისის „დინამოს“ მეკარე, რომელიც კლუბს „ლოკომოტივში“ ჰყავდა განათხოვრებული.
ამის შემდეგ „ვალენსიას“ და „ბარსელონას“ დავუკავშირდი. მათ ფეხბურთელის ყიდვა შევთავაზე, თუმცა წინადადებით მხოლოდ „ვალენსია“ დაინტერესდა. ყველა სკეპტიკურად უყურებდა 19 წლის მეკარის ტრანსფერს, ხალხი გაკვირვებულიც იყო, თუმცა „ვალენსიამ“ ფეხბურთელის ყიდვა მაინც გადაწყვიტა“, – ამბობს ესპანელი აგენტი.
ანტონიო ლოპეს-ენტრენამ ტრანსფერის დეტალებიც გაიხსენა.
„თავდაპირველად, გიორგი „ვალენსიას“ 2020 წლის დეკემბერში შევთავაზე და 2021 წლის აპრილში თვითონ დამიკავშირდნენ. ამ დროის განმავლობაში „ღამურების“ ხელმძღვანელები მამარდას ყურადღებით აკვირდებოდნენ, მოლაპარაკებები პანდემიამაც გააჭიანურა და საბუთების მოგვარებაც გარკვეულ სირთულეებთან ასოცირდებოდა. ვინაიდან, საქართველოში ესპანეთის საელჩო არაა, პროცედურების მოსაგვარებლად სტამბულში წასვლა იყო საჭირო. პირდაპირ გეტყვით, რომ მოლაპარაკებების ეტაპი ბოლოსკენ ცოტა დამღლელიც იყო, თუმცა საბედნიეროდ, ყველაფერი ზაფხულში გაირკვა და გიორგი „ვალენსიას“ შეუერთდა“, – იხსენებს ლოპეს-ენტრენა.
შეგახსენებთ, რომ ანტონიო ლოპეს-ენტრენას და ლევან სეთურიძის ძალისხმევით ესპანეთში არაერთი ქართველი ფეხბურთელია წასული, მათ შორის – გიორგი ქოჩორაშვილი („ლევანტე“) და გიორგი ჯინჯოლავა („კადისი“).
რაც შეეხება გიორგი მამარდაშვილს, ქართველმა მეკარემ მიმდინარე სეზონში „ვალენსიას“ შემადგენლობაში 12 მატჩი ჩაატარა, აქედან 10 ლა ლიგაში, 2 კი ესპანეთის სამეფო თასზე.
