საქართველოს ეროვნული ნაკრები, 2021 წლის პირველ ოფიციალურ მატჩს 25 მარტს სტოქკოლმში გამართავს, სადაც შვედეთის გუნდს დაუპირისპირდება. მოარულ ხმებს თუ დავუჯერებთ, იმ დროისთვის სკანდინავიელთა რიგებში ზლატან იბრაჰიმოვიჩი იქნება დაბრუნებული, რომელიც ნაკრებიდან კარგა ხნის წასული კი არის, მაგრამ ევროპის ჩემპიონატზე თამაში მოიწადინა და მშობლიური ქვეყნის მაისურს კვლავ მოირგებს. შემდეგ კი ესპანეთთან თბილისური ჯახია და იმედია გულშემატკივარს სტადიონზე შესვლის უფლება ექნება.
Primesport.ge საქართველოს ფეხბურთის ფედერაციის ვიცე-პრეზიდენტს ალექსანდრე იაშვილს დაუკავშირდა და წილისყრის გარდა, ფიფას მიერ დამტკიცებული კალენდრის შეფასება სთხოვა:
-რთული ჯგუფია. ამაში ორი აზრი არ არსებობს. კლასიკურ შესარჩევში იოლი ჯგუფის იმედი თითქმის აღარავის აქვს, ეს ხომ ერთა ლიგა არ არის, სადაც წილისყრის განსხვავებული მეთოდია.
ერთ, რომელიმე გრანდს რომ თავიდან ვერ ავიცილებდით მაგას იმთავითვე შეგუებულნი ვიყავით, მაგრამ საქმე-საქმეზე რომ მიმდგარიყო მეხუთე კალათიდან გაცილებით სუსტი მეტოქის იმედი კი მქონდა. ახლა კი ისე გამოვიდა, რომ სწორედ მაქედან გვერგო ყველაზე ძლიერი მოწინააღმდეგე.
სხვამხრივ, ჩვენ ჯგუფს შეგვიძლია დადებითი კუთხითაც შევხედოთ. მაგალითად, შვედეთის ნაკრებთან არასოდეს გვითამაშია და საინტერესო მატჩების მოლოდინში ვარ. ვფიქრობ, საინტერესო ბატალიები გველის და ამ რთულ მისიას თავი ღირსეულად უნდა გავართვათ.
კალენდარზე რას იტყოდით? რამდენად კმაყოფილი ხართ?
-გეცოდინებათ, ადრე თავად ჯგუფში თავმოყრილი გუნდების წარმომადგენლები იკრიბებოდნენ და ერთად მსჯელობდნენ კალენდრის განრიგზე. მაშინ შეიძებოდა შენთვის საუკეთესო ვარიანტის გატანისთვის გებრძოლა. ხან გამოდიოდა, ხან არა, მაგრამ რაღაც საშენოს მაინც წამოიღებდი.
ახლა ასე აღარ არის. ფიფა და უეფა გინსაზღვრავს და უნდა დაემორჩილო. იმაზე წუწუნს რა აჯობებდა აზრი აღარ აქვს. მარტში, ერთი კვირის ფარგლებში 3 თამაში გვიწევს, აქედან ორი გასვლაზე და თან ისე, რომ შუალედში თბილისში ესპანეთს ვეთამაშებით. მარტივი არ იქნება, მაგრამ სხვა გზა არ გვაქვს. მაქსიმალური კონცენტრაცია და მზადება შესარჩევი ეტაპის სტარტისთვის. ეს არის ჩვენი უმთავრესი ამოცანა.
