გადაწყვეტილი ამბავია. არა, ისედაც ვიცოდით და ამის შესახებ არაერთხელ ითქვა და დაიწერა, თუმცა დღეს ყველაფერი გაოფიციალურდა.
მოკლედ, ჰანს დიტერ ფლიკი გერმანიის ნაკრების მთავარი მწვრთნელი გახდა და კონტრაქტზეც ხელი მოაწერა. „ბაიერნის“ ყოფილი თავკაცი ერთი ხანობა „ბარსელონასაც“ დაუკავშირეს, თუმცა ყველაზე რეალური ვარიანტი სწორედ ბუნდესნაკრები იყო და ასეც მოხდა.
ფლიკი გერმანიის ეროვნულ ნაკრებს ევროპის ჩემპიონატის დასრულების შემდეგ ჩაუდგება, ხოლო იოახიმ ლიოვისთვის ევრო 2020 თავისთავად ბოლო ტურნირი იქნება მთავარი მწვრთნელის რანგში.
56 წლის ჰანს დიტერ ფლიკი გერმანიის ნაკრებში ადრეც მუშაობდა, ოღონდ მწვრთნელის თანაშემწედ. ასე რომ მისთვის იქაური შიდა სამზარეული კარგად არის ნაცნობი.
ბუნდესგუნდში ფლიკი 2024 წლამდე იმუშავებს და დადებითი შედეგების ჩვენების შემთხვევაში ალბათ კონტრაქტის გახანგრძლივებაც არ უნდა იყოს პრობლემა.
