სულ ცოტაც და ყველაზე გრანდიოზული სპორტული ფორუმი – ოლიმპიური თამაშები აიღებს სტარტს. საქართველოს დელეგაცია ტოკიოში სპორტის 11 სახეობაში 35 სპორტსმენით იქნება წარმოდგენილი. მათ შორის არის ჩოგბურთელი ნიკოლოზ ბასილაშვილიც.
გადაჭრით რაიმეს მტკიცებას არ ვაპირებთ, მაგრამ გავრცელებული ცნობის თანახმად, ბასილაშვილის გარდა იაპონიის დედაქალაქში სამეფო სპორტში სხვა წარმომადგენლებიც უნდა გვყოლოდა. კიდევ ერთხელ ხაზგასმით ავღნიშნავთ, რომ მტკიცებით ფორმაში არაფერს ვამბობთ და ყოველგვარი მიკიბვ-მოკიბვის გარეშე ოქსანა კალაშნიკოვას სკანდალურ პოსტს გთავაზობთ.
“ძალიან ნაღვლიანი ამბავია, როცა იგებ, რომ თურმე ტოკიოს ოლიმპიადაზე მოხვდი, მაგრამ ვერ მიდიხარ, რადგან განაცხადი არ გაუგზავნიათ. ოლიმპიადაზე მონაწილეობა ჩემი ოცნება იყო. ახლა მხოლოდ ტირილი მსურს.
ოლიმპიური თამაშები განსაკუთრებული მოვლენაა. წყვილთა თამაშიც ისევე მნიშვნელოვანია, როგორც სხვა. ყველგან ამაყობენ, რაც უფრო მეტი მონაწილე ჰყავთ ოლიმპიადაზე, მაგრამ, როგორც ჩანს, ჩემი ქვეყანა მათ შორის არაა.
კონკრეტულად ვისი ბრალია არ ვიცი, უბრალოდ, განაცხადი არ გაგზავნეს. არ ვიცი, რა მოხდა, არავინ მეუბნება ოფიციალურ პასუხს“ – წერს 30 წლის ქართველი ჩოგბურთელი სოციალურ ქსელში.
შეგახსენებთ, ოქსანა კალაშნიკოვა ძირითადად წყვილთა თანრიგში ასპარეზობს, სადაც ის მსოფლიოს 70-ე ჩოგანია, საუკეთესო მაჩვენებელი კი 43-ე ადგილი პოზიცია გახლდათ. WTA-ს ტურზე მას 4 ტიტული აქვს მოგებული.
