სად დაიკარგა ოლიმპიადის ორი ლიცენზია? დაუდევრობა, დასანანი გაუგებრობა, რომელიმე სტრუქტურის შეცდომა თუ არც არაფერი? უბრალოდ ეს ჩოგბურთის საერთაშორისო ფედერაციის გადაწყვეტილება იყო და წერტილი?
30 წლის ჩოგბურთელის, ოქსანა კალაშნიკოვას სკანდალურმა განცხადებამ ბევრი კითხვის ნიშანი გააჩინა და ქართული სპორტის ქომაგებიც საგონებელში ჩააგდო. ჩვენებური მეჩოგნის მტკიცებით, მან წყვილთა თანრიგში „ტოკიო 2020“-ის ლიცენზია მოიპოვა, სადაც პარტნიორობას ეკატერინე გორგოძე გაუწევდა, თუმცა უპასუხისმგებლობის გამო ეს შანსი მოუსპეს. ამიტომაც, ოქსანა კალაშნიკოვამ სპორტის საარბიტრაჟო სასამართლოსაც მიმართა და სიმართლის გარკვევას ამ გზით ეცდება.
კალაშნიკოვა-გორგოძის ირგვლივ ატეხილი აჟიოტაჟი განსჯის საგანი ალბათ კიდევ დიდხანს იქნება. გულშემატკივარს, სპორტულ მედიას, თავად ქართველ ჩოგბურთელებს აინტერესებთ რა მოხდა რეალურად და რატომ მოხვდნენ ოლიმპიურ ასპარეზზე ის წყვილები, რომლებიც რეიტინგში ჩვენებურებზე უკან იყვნენ?
„ტოკიოს ოლიმპიადაზე ერთის ნაცვლად, სამ ქართველ ჩოგბურთელს რომ ეთამაშა ჩემზე ბედნიერი ადამიანი არავინ იქნებოდა“ – ამბობს საქართველოს ჩოგბურთის ფედერაციის ვიცე-პრეზიდენტი აკა მეტრეველი გადაცემა „სპორტის საათში“.
„ვფიქრობ ეს ამბავი გარეთ არ უნდა გაგვეტანა. არ ოყო საჭირო საჯარო განსჯის საგანი გაგვეხადა. რადგან მაინც ასე მოხდა, გავაკეთებ დამატებით განმარტებებსაც.
სრული პასუხისმგებლობით შემიძლია განვაცხადო, რომ საერთაშორისო ფედერაციიდან ოფიციალურად და დადასტურებულად ოლიმპიური ლიცენზიის მოპოვებასთან დაკავშირებით წერილი მხოლოდ ნიკოლოზ ბასილაშვილზე მოგვივიდა, რის შესახებაც დაუყოვნებლივ ვაცნობეთ ოლიმპიურ კომიტეტს. რა მოხდა ოქსანა კალაშნიკოვასთან დაკავშირებით ეს ჩვენც გვაინტერესებს და გპირდებით, რომ აუცილებლად გავარკვევთ.
რატომ გადაწყვიტა ITF-მა ტოკიოში ასპარეზობის უფლება მიეცა მექსიკური და ბრაზილიური წყვილებისთვის, რომლებიც რეიტინგში ჩვენზე დაბლა დგანან ნამდვილად გამოცანად რჩება. საქართველოს ჩოგბურთის ფედერაციის ოფიციალურ განცხადებაშიც ამ საკითხისადმი ნათელის მოფენაზე გვაქვს ყურადღება გამახვილებული და სულაც არ მიმაჩნია, რომ ვინმესკენ თითი გავიშვირეთ.
სეოკ-ის წარმომადგენლებს ადგილზე, ტოკიოში შეუძლიათ მოიკითხონ და გაარკვიონ რა კრიტერიუმებით მოხდა მექსიკურ-ბრაზილიური წყვილის შერჩევა. მე თელავიდან, სადაც ახლა საერთაშორისო ტურნირს ვატარებთ ამის გაკეთება გამიჭირდება, თუმცა ჩვენის მხრივ საერთაშორისო ფედერაციასთან მიმოწერას აუცილებლად გავაგრძელებთ და სიმართლის დადგენას ვეცდებით. აქვე იმასაც ხაზგასმით ავღნიშნავ, რომ ტოკიოს ოლიმპიადაზე ასევე ვერ მოხვდა სლოვენიური წყვილი, რომელიც რეიტინგში ჩვენზე მაღლაა.
რაც შეეხება სპორტის საარბიტრაჟო სასამართლოსთვის მიმართვას, ოქსანა კალაშნიკოვასთან და ეკატერინე გორგოძესთან მქონდა საუბარი და მათ ეს გადაწყვეტილება ჩემი თანხმობით მიიღეს“ – აღნიშნავს აკა მეტრეველი.
