ესპანეთთან ნაომარი ჯვაროსნები უკვე საბერძნეთში არიან და ელადელებთან 31 მარტს გასამართი მატჩისთვის ემზადებიან.
მსოფლიო ჩემპიონატის შესარჩევი ეტაპის მესამე ტურში, 31 მარტს ქალაქ სალონიკში ბერძნები საქართველოს ნაკრებს დაუპირისპირდება და ალბათ 3 ქულაც დაგეგმილი აქვთ, თუმცა ეჭვგარეშეა, რომ ვილი სანიოლის შეგირდები უბრძოლველად არაფერს დათმობენ.
საბერძნეთის ნაკრების ჰოლანდიელმა მთავარმა მწვრთნელმა ჯონ ვან სჰიპმა მატჩისწინა პრესკონფერენცია გამართა და საქართველოსთან მოახლოებულ დაპირისპირებაზე ისაუბრა.
„საქართველოსთან მატჩისთვის სრულ მზადყოფნაში ვართ. ესპანელებთან დაპირისპირებაში რამდენიმე ფეხბურთელი გვაკლდა, მაგრამ ახლა ყველაფერი რიგზეა და სრული შემადგენლობით ვემზადებით.
რა თქმა უნდა, საქართველოს ნაკრების ორივე თამაში ვნახეთ და ვფიქრობ მეტს იმსახურებდნენ. ჩვენმა მომავალმა მეტოქემ ძალიან კარგი შთაბეჭდილება დატოვა.
ვილი სანიოლი უმაღლესი დონის ფეხბურთელი იყო. ის ცდილობს ნაკრებს ახალი ძალა და იდეები შთაბეროს. საქართველოს ნაკრებს პროგრესი აშკარად ეტყობა. მაქსიმალური კონცენტრირება გვმართებს, რათა დადებით შედეგს მივაღწიოთ.
ვფიქრობ გულშემატკივარს საინტერესო თამაში ელის“ – აღნიშნა საბერძნეთის ნაკრების მთავარმა მწვრთნელმა.
სალონიკში, საბერძნეთის და საქართველოს ნაკრების ჯახი 31 მარტს თბილისის დროით 22:45 წუთზე დაიწყება.
