იტალიის ჩემპიონატის მე-16 ტურში, „იუვენტუსმა“ პრინციპულ მეტოქესთან მნიშვნელოვანი გამარჯვება მოიპოვა. ტურინულმა გუნდმა სტუმრად, „მილანს“ 3:1 აჯობა და „როსონერის“ უფრო წინ გაჭრის საშუალება არ მისცა.
რა თქმა უნდა ამ დამაჯერებელი გამარჯვებით კმაყოფილია „იუვენტუსის“ მთავარი მწვრთნელი ანდრეა პირლო, რომელმაც მატჩის შემდგომ პრესკონფერენციაზე თავისი გუნდის სტაბილურობას გაუსვა ხაზი.
„იუვენტუსის კრედო ყოველთვის იყო მოედანზე კონტროლი დაეწესებინა. მნიშვნელობა არ ჰქონდა მეტოქეს, მთავარი მოწინააღმდეგეს თავზე შენი თამაში მოახვიო. სასიხარულოა, რომ „მილანთან“ ეს იდეალურად გამოგვივიდა და ჩემპიონატის ლიდერს დამაჯერებლად ვაჯობეთ.
ჩვენ არ გვაინტერესებს როგორ თამაშობენ სხვები, განსაკუთრებით ისინი ვინც სატურნირო ცხრილში „იუვენტუსზე“ მაღლა იმყოფებიან. ჩვენთვის მნიშვნელოვანია თავად რას ვაკეთებთ, როგორ გამოვიყურებით მოედანზე. კონცენტრაციას საკუთარი თამაშის ხარისხზე ვაკეთებთ. ვნახოთ, ვინ რომელ ადგილზე იქნება ორი თვის შემდეგ“ – აღნიშნა ანდრეა პირლომ.
