გიორგი მამარდაშვილის „ვალენსია“ ესპანეთის სამეფო თასის ნახევარფინალში ბილბაოს „ატლეტიკს“ ესტუმრა და ფრედ, 1:1 ითამაშა.
ქართველი გულშემატკივრებისთვის სასიხარულოდ, „ღამურების“ ძირითად შემადგენლობაში ზედიზედ მეორედ მოხვდა ქართველი მეკარე. მამარდაშვილმა მთლიანი შეხვედრა დამაჯერებლად ჩაატარა, თუმცა, კარის მშრალად შენახვა ვერ შეძლო.
მატჩში ანგარიში მასპინძლებმა 37-ე წუთზე გახსნეს. საჯარიმოს მისადგომებთან დანიშნული სტანდარტული იკერ მუნიაინმა საჯარიმოსკენ გაუშვა, სადაც ზუსტად რაულ გარსია გამოეხმაურა და საკუთარი გუნდი დააწინაურა.
„ვალენსიამ“ წონასწორობის აღდგენა მეორე ტაიმში შეძლო. 65-ე წუთზე გოლის გატანას ჯერ ბრაიან ხილი ცდილობდა, თუმცა მისი დარტყმული მეკარემ მოიგერია, დამატებაზე კი ჰუგო დურომ ყველას აჯობა და საბოლოო ანგარიშიც დააფიქსირა.
რაც შეეხება მამარდაშვილს, ქართველ მეკარის კარის მიმართულებით ბასკებმა ორჯერ დაარტყეს. აქედან, ერთხელ გაიტანეს, მეორედ დარტყმა კი 21 წლის გოლკიპერმა მოიგერია.
წყვილში გამარჯვებული ზუსტად 1 კვირაში, ამჯერად უკვე „ვალენსიას“ საშინაო არენა – „მესტალიაზე“ გამოვლინდება, გამარჯვებული კი ფინალში „ბეტისსა“ და „რაიო ვალეკანოს“ შორის გამარჯვებულს შეხვდება.
