15 ივლისს ბათუმის ახალი საფეხბურთო სტადიონი პირველ საერთაშორისო მატჩს უმასპინძლებს. ბათუმი არენაზე უეფა-ს კონფერენს ლიგის პირველი საკვალიფიკაციო ეტაპის საპასუხო შეხვედრაში, ბათუმის „დინამო“ სან მარინოს „ტრე პენეს“ მიიღებს.
ცნობილი გახდა, რომ Covid 19-ის პანდემიის გამო, ქვეყანაში არსებული რეგულაციებიდან გამომდინარე, შეხვედრაზე დასასწრები ყველა ბილეთის რეალიზაცია, ონლაინ რეჟიმში მოხდება. ბილეთების გაყიდვა 12 ივლისს, დილის 10:00 საათიდან biletebi.ge-ზე დაიწყო. ბილეთის ფასი 5, 10, 15 და 25 ლარია.
მატჩს გულშემატკივართა შეზღუდული რაოდენობა დაუშვეს, რაც სტადიონის საერთო ტევადობის 50%-ს გულისხმობს. ეს კი 10 ათასი მაყურებლის შეშვებას ითვალისწინებს. დიდი ალბათობით, ბათუმელებს გულშემატკივრის მხარდაჭერა გარანტირებული ექნებათ.
უეფა-ს კონფერენს ლიგის პირველი საკვალიფიკაციო ეტაპის პირველ მატჩში ბათუმის „დინამომ“ სან მარინოში, გასვლით შეხვედრაში „ტრე პენე“ 4:0 დაამარცხა და დიდი ალბათობით, შემდეგ წრეში გავა. მოგების შემთხვევაში, ბათუმის „დინამო“ კონფერენს ლიგის მეორე საკვალიფიკაციო ეტაპზე ბელარუსის კლუბ, „ბატეს“ დაუპირისპირდება.
