ნახევარ საუკუნეზე მეტია ინგლისელი ქომაგები ამ დღეს ელოდნენ. „სამი ლომი“ მსხვილი საფეხბურთო ფორუმის ფინალშია და სანუკვარ ჯილდომდე ერთი ნაბიჯი აშორებს.
1966 წლის მუნდიალის შემდეგ, სადაც ინგლისის ნაკრებმა საკუთარ კედლებში მსოფლიოს ჩემპიონის ტიტული მოიპოვა, ნისლიანი ალბიონის წარმომადგენლებმა განსაკუთრებულს ვეღარაფერს მიაღწიეს. ევროპისა თუ მსოფლიოს ჩემპიონატებზე ინგლისის ნაკრებს ხან ბედი არ სწყალობდა, ხანაც უსუსუსად გამოიყურებოდნენ.
ის რაც ვერ შეძლო არაერთმა გამოცდილმა მწვრთნელმა, მოახერხა გარეთ საუთგეიტმა. ინგლისის ნაკრები ევრო 2020-ის ფინალშია და 11 ივლისს, მშობლიურ უემბლიზე იტალიის ნაკრებს დაუპირისპირდება.
ფინალური ჯახის წინ, ინგლისელთა თავკაცმა მედიასთან ისაუბრა და არც „სკუადრა აძურას“ შექება დავიწყებია.
„2018 წლის მუნდიალზე ფინალამდე სულ ცოტა დაგვაკლდა. ეს ამბავი მაშინ ძალიან განვიცადეთ. საბედნიეროდ, რეაბილიტაცია ამ ევროპის ჩემპიონატზე მოვახერხეთ.
იტალიის ნაკრებს, დიდ ტურნირებზე ჩვენგან განსხვავებით საოცარი შედეგი აქვთ. ისინი ფინალს უკვე მეათედ ითამაშებენ, რაც მათ უდიდეს ტრადიციებსა და სიძლიერეზე მეტყველებს. იტალიის შედეგებამდე ჯერ კიდევ ბევრი გვიკლია.
იტალია განსაკუთრებული ნაკრებია, რობერტო მანჩინიმ კი არნახული სამუშაო გასწია. სკუადრა აძურამ მთელი ტურნირი ერთი ამოსუნთქვით ჩაატარა და ფინალშიც დამსახურებულად გავიდნენ.
ცხადია, დიდ წნეხს ვგრძნობთ. კარგია, რომ ფინალური დაპირისპირება უემბლიზე გაიმართება, სადაც ქომაგების მხურვალე მხარდაჭერა გვექნება. ახლა ყველაფერი იმაზეა დამოკიდებული თუ რომელი გუნდი ითამაშებს საუკეთესოდ“ – აღნიშნავს გარეთ საუთგეიტი.
