საქართველოს ნაკრების მცველმა, დავით ხოჭოლავამ შესაძლოა დონეცკის „შახტარი“ დატოვოს. უკრაინული მედიის ცნობით, ქართველი ფეხბურთელით თურქული „ტრაბზონსპორია“ დაინტერესებული.
თურქები მზად არიან ხოჭოლავას სანაცვლოდ უკრაინულ გუნდს 2.5 მილიონი ევრო გადაუხადონ. აღსანიშნავია, რომ დონეცკელებს ახალი მთავარი მწვრთნელი ჰყავთ, იტალიელი რობერტო დე ძერბი და შედის თუ არა ხოჭოლავა მის გეგმებში, ჯერჯერობით უცნობია.
გუნდში მოსვლის შემდეგ დე ძერბიმ ისიც თქვა, რომ „შახტარს“ ორი ცენტრალური მცველის შეძენა სურს, რაც იმაზე მიუთითებს, რომ ქართველმა მცველმა შესაძლოა გუნდი მართლაც დატოვოს. ქართველი ფეხბურთელი ამჟამად გუნდთან ერთად იმყოფება და ახალი სეზონისთვის ემზადება.
28 წლის დავით ხოჭოლავა „შახტარში“ 2017 წლიდან თამაშობს და 83 მატჩში 3 გოლი გაიტანა. ის სამჯერ გახდა უკრაინის ჩემპიონი, ორჯერ უკრაინის თასის მფლობელი, ერთხელ კი უკრაინის სუპერთასი მოიგო.
