ისტორია დაიწერა. ყოველშემთხვევაში წყალი არ გაუვა, რომ „ვილიარეალისთვის“ ნამდვილად განსაკუთრებული სეზონია.
ესპანური გუნდი არსებობის მანძილზე ევროთასების ფინალში პირველად გავიდა. ამ შედეგს კი „ვილიარეალმა“ უნაი ემერის ხელში მიაღწია. მწვრთნელის, რომელიც გადაუჭარბებლად შეიძლება ევროპა ლიგის სპეციალისტად შევრაცხოთ.
ამრიგად, 2019 წელი აღარ განმეორდება, როდესაც უეფას ორივე საკლუბო ტურნირის ფინალში ინგლისური გუნდები გავიდნენ. ჩემპიონთა ლიგაზე „ლივერპული“ – „ტოტენჰემი“, ხოლო ევროპა ლიგაზე „ჩელსი“ და „არსენალი“.
„თავს უბედნიერეს ადამიანად ვგგრძნობ. ყველანი ძალზედ გახარებულები ვართ. ის, რომ ამ პრესტიჟული ევროტურნირის ფინალში გავედით, ჩვენი გუნდისთვის მეტად საჭირო და მნიშვნელოვანია.
კარგია, რომ ორივე ტურნირზე ინგლისური ფინალები აღარ იქნება. ძალიან არ გვსურდა ეს ასე მომხდარიყო. ახლა ზეიმის და დასვენების დროა, შემდეგ კი ფინალისთვის სრულფასოვან მზადებას დავიწყებთ“ – აღნიშნავს „ვილიარეალის“ პრეზიდენტი ფერნანდო როიგი.
ევროპა ლიგის ფინალი 26 მაისს პოლონეთის ქალაქ გდანსკში გაიმართება, სადაც „ვილიარეალი“ ინგლისურ „მანჩესტერ იუნაიტედს“ დაუპირისპირდება.
