სერბეთის დედაქალაქში გამართული 250-იანი კატეგორიის საჩოგბურთო ტურნირი მატეო ბერეტინის გამარჯვებით დასრულდა.
სიმართლე ითქვას, ჩოგბურთის სპეციალისტები და რიგითი გულშემატკივრები ბელგრადში ნოვაკ ჯოკოვიჩის ტრიუმფს ელოდნენ, თუმცა სერბმა მონსტრმა ქომაგებს იმედები გაუცრუა. ნოლე ნახევარფინალში ასლან კარაცევთან დამარცხდა.
სამაგიეროდ, რუსი ჩოგბურთელი ფინალში მატეო ბერეტინიმ დაამწუხრა. იტალიელმა მეჩოგნემ, რომელიც რეიტინგის მე-10 ნომერია, კარაცევს სამ სეტიან დაპირისპირებაში – 6:1, 3:6, 7:6 აჯობა და ბელგრადის ტურნირის ჩემპიონიც დამსახურებულად გახდა.
25 წლის ბერეტინისთვის ეს კარიერაში ATP-ის მეოთხე მოგებული ტიტულია. ბელგრადში გამარჯვებით მან 250 სარეიტინგო ქულა გამოიმუშავა.
