ნიკოლოზ ბასილაშვილმა ბელგრადის ტურნირი დაიწყო და პირველივე მატჩში დაამთავრა. ქართველი ჩოგბურთელი ორგანიზატორების მიერ მესამე ნომრად იყო განთესილი და ამიტომაც შეჯიბრში მეორე ეტაპიდან ჩაერთო, თუმცა სამწუხაროდ წარუმატებლად.
ბასილაშვილის მეტოქე რეიტინგის 119-ე ნომერი ანდრე მარტინი იყო და ცხადია წყვილის ფავორიტადაც ჩვენებური მეჩოგნე მიიჩნეოდა, თუმცა ქომაგებს იმედები გაუცრუა.
მიუხედავად უცუდესი სტატისტიკისა, ნიკოლოზ ბასილაშვილს ამ დაპირისპირებაში ერთი მაჩბოლი მაინც ჰქონდა, მაგრამ ვერ გამოიყენა და საბოლოოდ 3 სეტიან თრილერში – 1:6, 6:4, 6:7 დამარცხდა.
რადგან სტატისტიკა ვახსენეთ ისიც ვთქვათ, რომ ნიკოლოზ ბასილაშვილმა ჯამში 12 ორმაგი შეცდომა დაუშვა, რაც დაგვეთანხმებით ძალზედ ბევრია, ხოლო საკუთარი ჩაწოდება 9-ჯერ წააგო. პირველი სეტის 1:6 წაგების შემდეგ, ბასილაშვილი მეორე პარტიაშიც ბრეიქით აგებდა, თუმცა ძალები მოიკრიბა, უკეთ ათამაშდა და მეტოქესაც 6:4 აჯობა.
მესამე გადამწყვეტ სეტში კი წესით ფსიქოლოგიური უპირატესობა ბასილაშვილის მხარეს უნდა ყოფილიყო, მაგრამ მოხდა პირიქით. ქართველი ჩოგბურთელი საკუთარ მოწოდებებს აგებდა, არაერთ უხეშ შეცდომას უშვებდა და სლოვაკი ჩოგბურთელიც 5:2 დაწინაურდა. თითქოს ყველაფერი დასრულებული ჩანდა, თუმცა ბასილაშვილს თითქოს მეორე სუთქვა გაეხსნაო და ზედიზედ 4 გეიმიც მოიგო. როგორც ზემოთ ავღნიშნეთ მაჩბოლიც ჰქონდა, მაგრამ ვერ გამოიყენა და ეს დრამატული ბრძოლაც ტაიბრეიქზე წააგო.
საგულისხმოა, რომ ანდრე მარტინს ATP ტურში ზედიზედ ორი გამარჯვება აქამდე არასდროს მოეპოვებინა და ეს სწორედ ნიკოლოზ ბასილაშვილის დამარცხების შემდეგ შეძლო.
ამრიგად, როლან გაროსამდე ბოლო გენერალური რეპეტიცია ნიკოლოზ ბასილაშვილისთვის უიღბლო გამოდგა.
