ქართველმა ოლიმპიელებმა დღეს დაასრულეს გამოსვლა ტოკიოს XXXII ოლიმპიურ თამაშებზე. ჩვენი ნაკრების მონაგარი რიოს ოლიმპიური თამაშებისას ჯობნის როგორც მედლების რაოდენობით, ასევე მედლების ხარისხით.
ჩვენი გუნდი მეთხუთმეტე საშეჯიბრო დღეს ორი ოლიმპიელით იყო წარმოდგენილი. თავისუფალი სტილით ჭიდაობაში მსოფლიოს ჩემპიონატის ერთი ბრინჯაოს და ევროპის ჩემპიონატების ხუთი ბრინჯაოს მედლის მფლობელმა, ასევე ევროპული თამაშების მესამე ადგილოსანმა ელიზბარ ოდიკაძემ (97 კგ), რომელსაც მეოთხედფინალში მომავალ ჩემპიონთან, რუსეთის ოლიმპიური კომიტეტის წარმომადგენელთან, აბდულრაშიდ სადულაევთან წაგებით ბრინჯაოს მედლისთვის ბრძოლის შანსი მიეცა, შესაძლებლობა ვერ გამოიყენა. ქართველი ფალავანი ლონდონის ოლიმპიური თამაშების ჩემპიონთან, აზერბაიჯანელ შარიფ შარიფოვთან 5:7 დამარცხდა და ოლიმპიურ თამაშებს დაემშვიდობა.
7 აგვისტოს საქმეში ჩაერთო საქართველოს ოლიმპიური გუნდის ბოლო წევრი,.კარატეში პირველი ქართველი მსოფლიოს ჩემპიონი, ასევე ევროპის ჩემპიონატის და ევროპული თამაშების ბრინჯაოს მედლის მფლობელი გოგიტა არქანია (+75 კგ). ტოკიოს ნიპონ ბუდოკანში სადებიუტო ოლიმპიური მედლებისთვის მსოფლიოს 10 უძლიერესი კარატისტი იბრძოდა. ქართველმა მებრძოლმა ჯგუფში იაპონელ, თურქ, გერმანელ და ყაზახ მეტოქეებთან ოთხი საკვალიფიკაციო შეხვედრა ჩაატარა. არქანიამ გერმანიის და ყაზახეთის წარმომადგენლებს მოუგო, მაგრამ ეს საკმარისი არ აღმოჩნდა ნახევარფინალში გასასვლელად და ასპარეზობის გასაგრძელებლად.
საქართველოს ოლიმპიურმა გუნდმა ტოკიოში ასპარეზობა 2 ოქროს, 5 ვერცხლის და 1 ბრინჯაოს მედლით დაასრულა, საერთო ჩათვლაში კი 30-ე პოზიციაზე ვართ. დევიზი – „უკეთ, ვიდრე რიოში“ შესრულებულია. ერთ თამაშებზე მოპოვებული 8 მედალი დამოუკიდებელი ქვეყნის ისტორიაში რეკორდულია.
საქართველოს წარმომადგენელთაგან კვარცხლბეკის უმაღლეს საფეხურზე ავიდნენ ძიუდოისტი ლაშა ბექაური და ძალოსანი ლაშა ტალახაძე.
ჩემპიონობამდე ნაბიჯი დააკლდათ ძიუდოისტებს ვაჟა მარგველაშვილს, ლაშა შავდათუაშვილს და გურამ თუშიშვილს. ბერძნულ რომაული სტილით მოჭიდავე იაკობ ქაჯაიას და თავისუფალი სტილით მოჭიდავე გენო პეტრიაშვილს. ბრინჯაოს მედალი მოიპოვა ძალოსანმა ანტონ პლესნოიმ.
თავისი წილი ისტორია დაწერა ჩვენმა ტყვიის მსროლელმა ნინო სალუქვაძემაც. ქართველი ოლიმპიელი გახდა პირველი ქალი სპორტსმენი, რომელიც ცხრა ოლიმპიურ თამაშებზე გამოვიდა.
XXXIII ოლიმპიურ თამაშებს პარიზი 2024 წელს მიიღებს. ცვლილებაა ქართველ ოლიმპიელთა დევიზში და დღეიდან ის ასე ჟღერს: „უკეთ, ვიდრე ტოკიოში!“
