ქართველი გულშემატკივრებისთვის კარგი და სიგიჟემდე გასახარი იქნებოდა ის დიდებული გოლი გამარჯვების მომტანი ყოფილიყო, მაგრამ მიუხედავად მარცხისა ესპანეთთან ხვიჩა კვარაცხელიას ბენეფისი დავიწყებას ალბათ დიდხანს არ მიეცემა.
ქართველი ტალანტი საფეხბურთო ექპერტების თუ სკაუტების ყურადღების ცენტრში ისედაც იყო, მაგრამ 28 მარტის საღამოს შემდეგ მისი ცნობადობა გაცილებით გაიზარდა და არაერთი უცხოური გამოცემა დითირამბებს არ იშურებს.
ჯანლუკა დი მარციო გამოჩენილი იტალიელი ჟურნალისტი და სატრანსფერო ექსპერტია. მის მოსაზრებებს ყოველთვის აფასებენ და ხშირად ითვალისწინებენ. ჰოდა, იტალიური და ზოგადად მსოფლიო მედიის ერთ-ერთმა ცნობილმა წარმომადგენელმა არ დაიზარა და ხვიჩა კვარაცხელიას საკმაოდ ვრცელი სტატია მიუძღვნა, რომელიც ტვიტერის საკუთარ გვერდზე გამოაქვეყნა
„1300 დღე. საქართველოს ნაკრების მიერ მსოფლიო ჩემპიონატის საკვალიფიკაციო ეტაპზე გატანილი ბოლო გოლიდან დიდი ხანი იყო გასული, სანამ კვირა საღამოს ხვიჩა კვარაცხელიამ ესპანეთის წინააღმდეგ გამართულ შეხვედრაში ეს სერია არ დაასრულა. მის გოლს მატჩის შედეგზე გადამწყვეტი გავლენა არ მოუხდენია, მაგრამ მნიშვნელოვანი ნამდვილად იყო, რადგან ხვიჩა კვარაცხელია ქართული ფეხბურთის ახალი იმედი გახლავთ.
2001 წელს დაბადებული კვარაცხელია, რომელიც რუბინის საკუთრებაა, 21-ე საუკუნეში დაბადებული პირველი ფეხბურთელია, რომელმაც რუსეთის პრემიერ ლიგაში ითამაშა. მისთვის ადრეული წარმატება სიახლეს არ წარმოადგენს. საქართველოს ნაკრების რიგებში მისი დებიუტი 18 წლისა და 3 თვის ასაკში შედგა და ეროვნული გუნდის მაისურით გამართულ 7 შეხვედრაში მის ანგარიშზე 2 გოლი და ამდენივე შედეგიანი გადაცემაა.
ქართველი ფეხბურთელი ფიზიკური სიძლიერით გამოირჩევა, ვარდნებს მშვენივრად უმკლავდება და ორივე ფეხში ფეთქებადი ძალა აქვს, რისი წყალობითაც აჩქარებები, ტემპის შეცვლა და ორთაბრძოლებისას ბალანსის შენარჩუნება შესანიშნავად გამოსდის.
კვარაცხელია ბრწყინვალე ტექნიკითაა დაჯილდოებული. მას, როგორც გრძელ, ისე მცირე მონაკვეთზე, შესანიშნავი დრიბლინგი აქვს, მეტოქეებს იოლად სცდება და მიმართულების შეცვლაც ეხერხება. თუ ხვიჩა თავისუფალ ზონაში იმყოფება და შესატევად სივრცე აქვს, იგი მეტოქეებისთვის გამანადგურებელია. მას არაპროგნოზირებადი მოძრაობები ახასიათებს და ორივე ფეხით საკმაოდ ძლიერი დარტყმის განხორციელება შეუძლია. ორი რამაა, რაშიც კვარაცხელიას მოსამატებელი აქვს – დაცვაში თამაში და მატჩებისას გამძლეობა“ – წერს ჯანლუკა დი მარციო.
