ზვერევის და ბასილაშვილის ერთი ბედი – გერმანელს ძალადობაში ადანაშაულებენ

ყოველთვის იყო, არის და ალბათ მომავალშიც იქნება. ესა თუ ის შემთხვევა რამდენად შეესაბამება სიმართლეს რა თქმა უნდა განხილვის საგანია, ხშირად ცილისწამებასაც ჰქონია ადგილი, მაგრამ ის რომ გამოჩენილ სპორტსმენებს ყოფილი შეყვარებულები ან მეუღლეები ძალადობაში ადანაშაულებენ პირველად ნამდვილად არ გვსმენია.

თუნდაც ნიკოლოზ ბასილაშვილის ირგვლივ განვითარებული სკანდალი რად ღირს, როდესაც ქართველი ჩოგბურთელი ყოფილმა მეუღლემ ძალადობაში დაადანაშაულა და საქმე დღესაც სასამართლოშია. სწორედ, მას შემდეგ წავიდა უკან ჩვენებური მეჩოგნის საქმე. რეიტინგშიც დაქვეითდა და ფსიქოლოგიური პრობლემები გაუჩნდა, რაც შეუიარაღებელი თვალითაც კარგად ჩანს.

პრობლემები შეექმნა კიდევ ერთ გამოჩენილ ჩოგბურთელს ალექსანდრე ზვერევსაც. გერმანელ მეჩოგნეს, ყოფილმა მეგობარმა გოგონამ ოლგა შარიპოვამ უხეშად მოპყრობაში დასდო ბრალი. მომხდარით გაოგნებულია თავად ალექსანდრე ზვერევი და ამ ფაქტს ახსნას ვერ უძებნის.

-ჰამბურგში ვიმყოფებოდი, როდესაც ტელეფონზე შეტყობინებების წვიმა მოვიდა. ვკითხულობდი და თვალებს არ ვუჯერებდი – ამბობს ალექსანდრე ზვერევი პოპულარულ გამოცემა Bild-თან საუბარში.

-ეს ბრალდება მთლიანად ცილისწამებაა?

-რა თქმა უნდა. ყველაფერი სიცრუეა. დღეს, სოციალურ ქსელში ადამიანებს ათასი სისულელის მოგონება და ვინმეს დადანაშაულება შეუძლიათ.

-ცილისწამებისთის სასამართლოში რატომ არ იჩივლეთ?

-არ ჩავთვალე საჭიროდ, რადგან რაც უფრო ბევრს გავქექავთ ამ აბსურდს, მით უფრო არ მიეცემა დავიწყებას ეს ისტორია. ამიტომაც, ჩვენმა გუნდმა გადავწყვიტეთ, რომ არ ღირდა სასამართლოსთვის მიგვემართა.

-ოლგასთან ამ თემაზე არ გილაპარაკიათ?

-არა. მასთან 2019 წლის შემდეგ ანუ რაც დავშორდით კავშირი აღარ მქონია.

-თქვენი აზრით, რისთვის დასჭირდებოდა მას ამ ამბის გამოგონება?

-ეს მეც ძალიან მაინტერესებს. შესაძლოა მიზეზი ეჭვიანობა იყო. მან ეს ამბავი მას შემდეგ ააგორა, რაც შეიტყო, რომ ჩემი ახალი შეყვარებული ბრენდა პატეა ფეხმძიმედ იყო.

ოლგა დაშორების შემდეგ მუდამ ცდილობდა ურთიერთობის აღდგენას. ამას ჩემი მშობლების დახმარებით ცდილობდა.

-ასეთი ბრალდების შემდეგ არ გაგიჭირდათ საზოგადოებაში გასვლა?

-კი, ნამდვილად რთული იყო. ისეთი შეგრძნება გაქვს, თითქოს ყველა შენ გიყურებს. მეგობრებისგან და ნათესავებისგან დიდი მხარდაჭერა ვიგრძენი და ამან გადამატანინა. ახლა კი მთლიანად ჩოგბურთზე ვარ ფოკუსირებული.