მადრიდის „რეალი“ ჩემპიონთა ლიგის მეოთხედფინალშია. სამეფო გუნდმა „ატალანტას“ განმეორებით დაპირისპირებაშიც აჯობა. ზიდანის გუნდმა მეტოქე დამაჯერებლად 3:1 დაამარცხა.
მადრიდელთაგან გოლები ქარიმ ბენზემამ, სერხიო რამოსმა და ასენსიომ გაიტანეს, ხოლო სტუმართაგან თავი მურიელმა ლამაზი საჯარიმო დარტყმით გამოიჩინა.
კმაყოფილი იყო „რეალის“ დამრიგებელი ზინედინ ზიდანი.
„შემიძლია თამამად ვთქვა, რომ რეალმა იდეალური მატჩი ჩაატარა. ჩემპიონთა ლიგის მეოთხედფინალში გასვლით ბედნიერი ვარ. ბიჭებსაც გულწრფელად მივულოცე ეს წარმატება.
ატალანტა კარგი გუნდია. მათ შეტევა უყვართ და გოლების გატანაც იციან. ასეთ გუნდთან ყოველთვის სიფრთხილე გმართებს, რადგან არ იცი რას უნდა ელოდო. დღეს მეტოქეს ბევრი შანსი არ მივეცით, რაც იმაზე მიუთითებს, რომ დაცვაში მწყობრად ვმოქმედებდით.
ჩვენი მიზანი რა თქმა უნდა მომდევნო ეტაპზე გასვლა იყო. პირველი მატჩის შემდეგ ეს მისია ნაწილობრივ შევასრულეთ, მაგრამ არც დღეს მქონა მარტივად გასეირნების მოლოდინი, თუმცა კარგია, რომ გულშემატკივრებს ბევრი სანერვიულო არ მივეცით“ – აღნიშნა ზინედინ ზიდანმა.
